I dërguari special i Shteteve të Bashkuara të Amerikës, Gabriel Escobar ka ripërsëritur edhe njëherë se SHBA-të përkrahin iniciativën e “Ballkanit të Hapur”
Në fjalimin e tij përmes një video-lidhjeje, Escobar ka thënë se kjo iniciativë është e suksesshme atëherë duhet të jetë e hapur për të gjitha gjashtë vendet e Ballkanit Perëndimor, që të përfshihen në nivel të njëjtë.
“SHBA-të mbështesin “Ballkanin e Hapur”. Duhet punuar jo vetëm në bashkëpunim rajonal ekonomik, por edhe në bashkëpunim për integrim në struktura evropiane. Ka shumë iniciativa për krijimin e një integrimi ekonomik. Secila iniciativë për integrim ekonomik, duhet të përfshijë të gjitha 6 shtetet e Ballkanit Perëndimor në nivel të njëjtë”, ka thënë Escobar.
Escobar ka vlerësuar se Ballkani Perëndimor ka rritje të madhe ekonomike, ndërsa ka potencial të jetë qendër e energjisë ripërtëritëse, qendër e gazit natyror, e të ndihmojë Evropën të lirohet nga varshmëria nga gazi rus.
Ai ka thënë po ashtu se liderët duhet të punojnë për të krijuar kushte më të mira për investuesit, dhe për të ndihmuar investuesit që dëshirojnë të punojnë në përputhje me ligjet.
“Në fund uroj që kjo iniciativë të mbetet ekonomike, nuk është projekt politik, por i rëndësishëm ekonomik, e me rëndësi edhe të ngelet ashtu. Të fokusohet në krijimin e mundësive për njerëzit e rajonit”, tha Escobar. /Telegrafi/
