Ad image

Rizvanolli: Strategjia e re e energjisë i jep formë ekonomisë së Kosovës

Kosova News
Kosova News 13:15 -07/06/2022

Ministrja e Ekonomisë, Artane Rizvanolli, sot në një konferencë për media ka bërë me dije se “Strategjia e re e Energjisë 2022-2031”, do t’i jep formë ekonomisë dhe sektorit energjetik të Kosovës.

“Ka qenë tejet e rëndësishme që strategjia e energjisë të jetë e balancuar. Strategjia paraqet rrugën e re që të ecim përpara. Në këtë strategji kemi dhënë zgjidhje të reja për energjinë”, tha ajo, raporton RTKlive.

Sipas saj siguria e furnizimit do të përforcohet që të kemi stabilitet.

“Në Termocentralin “Kosova B” do të bëhen investime për të arritur efiçiencën dhe për të ulur ndotjen. Një njësi  e “Kosovës  A”, do të revitalizohet”, tha ajo.

Po ashtu sipas ministres, do të punohet për të ndërtuar kapacitete të reja për të prodhuar energji nga dielli dhe era. Sipas saj synohet që në vitin 2028 njësitë e “Kosovës A”, të punojnë vetëm gjatë dimrit kur ka nevojë më shumë për energji.

Ajo ka folur edhe për integrimin e energjisë me Shqipërinë, për të cilën tha se Qeveria e Kosovës është e interesuar për të thelluar bashkëpunimin.

Rizvanolli: Gjykata ka shtyrë vendimin për tarifa, nuk e ka anuluar atë

Ministrja e Ekonomisë, Rizvanolli, në konferencën për media, ka folur për vendimin për tarifa.

“ZRRE është ajo që duhet të jap sqarimet e duhura, vendimet e Gjykatës kanë sjellë paqartësi. Ekziston një keqinformim dhe keqkuptim, se vendimi për tarifa është anuluar”, tha ajo. /rtklive/

Shpërndaje