Stabilizohet situata e furnizimit me energji elektrike në Kosovë, pasi që KEK ka rikthyer në funksion bllokun B2 dhe A3
KEDS ka njoftuar se aktualisht janë ndalur kufizimet e energjisë elektrike me hyrjen në prodhim të bllokut B2 dhe A3, pasi që gjendja është stabilizuar për momentin.
“Pavarësisht kësaj, kursimi është i domosdoshëm! Prandaj, ftojmë konsumatorët t’i bashkohen thirrjes sonë për kursim të energjisë sepse çdo kilovat është i rëndësishëm të kursehet duke marrë parasysh krizën energjetike që ka kapluar gjithë botën”, thuhet në njoftimin e KEDS.
Por, KEDS thekson se duhet kursyer energjinë elektrike dhe të përdoret racionalisht.
“Në këto rrethana të vështira, ajo se çfarë na duhet është të jemi të bashkuar për tejkalimin e krizës.Bashkë ia dalim!”.
Korporata Energjetike e Kosovës (KEK) ka njoftuar më parë se sot ka përfunduar remonti i rregullt në njësinë prodhuese B-2, e cila tashmë është duke prodhuar rreth 260 MW/h.
Në njoftim po ashtu thuhet se në mëngjesin e sotëm ka përfunduar edhe sanimi i rrjedhjeve të ujit në njësinë A-3 e cila është kthyer në prodhim me kapacitet prej 130 MW/h.
“Korporata Energjetike e Kosovës ju siguron që do të vazhdoj me përkushtim t’i përfundoj edhe remontet e rregullta në njësitë tjera konform planit në mënyrë qe deri ne fillim të sezonit dimëror të operoj me dy njësi të TC-A dhe dy njësi të TC-B me kapacitet prej rreth 800 MW/h”, thuhet në postimin e KEK-ut në Facebook.
