Tre persona kanë mbetur të lënduar si pasojë e një aksidenti trafiku që ka ndodhur sot pasdite në rrugën Prishtinë-Podujevë, saktësisht në fshatin Vranidoll.
Në aksident janë përfshirë një veturë dhe një motoçikletë.
Lajmin e ka konfirmuar zëdhënësja e Policisë së Kosovës për rajonin e Prishtinës, Flora Ahmeti.
“Sot rreth orës 14:00 ne rrugën Prishtinë – Podujevë, saktësisht në fshatin Vranidoll, ka ndodhur një aksident trafiku në mes të një automjeti dhe një motoçiklete. Si pasojë e aksidentit tre persona kanë pësuar lëndime trupore. Të njëjtit janë dërguar për tretman mjekësor. Me rastin po merret njësiti i trafikut”, deklaroi Ahmeti.
E sot në orët e para të mëngjesit po në aksin rrugor Prishtinë-Podujevë ndodhi një aksident tragjik, ku për pasojë gjetën vdekjen e dy persona.
Të vdekur mbetën çifti Shemsedin Sopaj 36 vjeç dhe Mirvete Sopaj 35 vjeçe, ndërsa të lënduar kanë mbetur dy fëmijët e tyre.
