Në mbledhjen e saj të 263-të, Qeveria e Kosovës ka miratuar 13 vendime që përfshijnë mbështetje për mërgatën, ndihmë për shqiptarët në Luginën e Preshevës dhe investime konkrete në komuna të ndryshme të vendit.
Përmes një postimi në profilin e tij zyrtar, kryeministri Albin Kurti ka bërë të ditur se janë ndarë 4 milionë euro për mbulimin e policës së sigurimit (kartonit të gjelbër) për bashkatdhetarët që udhëtojnë drejt Kosovës gjatë sezonit veror.
“Mirëpresim si çdoherë bashkatdhetarët tanë që vijnë për pushime në Kosovë. Për këtë arsye, kemi ndarë 4 milionë euro për mbulimin e kartonit të gjelbër, për t’ua lehtësuar sa më shumë hyrjen në atdhe,” tha Kryeministri Kurti.
Një tjetër vendim i rëndësishëm ishte ndarja e 626,400 eurove për mbështetjen e arsimit dhe lobimit institucional për shqiptarët në Preshevë, Medvegjë dhe Bujanoc, përfshirë bursa për studentët, mbështetje për nxënësit dhe financim të aktiviteteve lobuese në nivel ndërkombëtar.
Qeveria gjithashtu miratoi kërkesën për huamarrje deri në 10 milionë euro për ndërmarrjen “Infrakos Sh. A”, me qëllim të mbulimit të obligimeve të likuiditetit dhe vazhdimit të rehabilitimit të linjës hekurudhore 10.
Në fushën e zhvillimit lokal, u rialokuan 50 mijë euro për ndriçimin publik në fshatrat Nakell dhe Gorazhdec të Komunës së Pejës.
Po ashtu, u emërua Komiteti Ndërministror “Një shëndet”, që do të merret me çështjet ndërsektoriale të shëndetit njerëzor, shtazor dhe mjedisor.
Qeveria ndërmori edhe shpronësimin e pronave të paluajtshme ish-shoqërore në Komunën e Hanit të Elezit, për realizimin e katër projekteve të rëndësishme:
Rindërtimin e fushës së futbollit;
Rregullimin e pronësisë për Fabrikën e Ujit;
Ndërtimin e Qendrës për Kulturë dhe Rini;
Zgjerimin e rrugës pranë Terminalit Doganor.
Vendimet e fundit dëshmojnë përkushtimin e Qeverisë për zhvillim të barabartë rajonal, ruajtjen e lidhjeve me diasporën dhe përkrahjen e komuniteteve shqiptare jashtë kufijve.
