Eranda Kumnova Baçi, drejtoreshë e Drejtorisë së Arsimit në Gjakovë, ka thënë se po shpresojnë për asistimet e drejtorëve të shkollave në vlerësimet e mësimdhënësve.
“Ne kemi biseduar edhe me drejtorët e shkollave dhe po shpresojmë për asistimet e tyre në orë, për shkak se ata kanë të drejtë vlerësimin për mësimdhënësit. (Vlerësimet) të jenë më të shpeshta”, ka thënë ajo.
Mirëpo, Kumnova Baçi është shprehur se është pro testimit të mësimdhënësve.
“Unë personalisht mendoj se do të ishte mirë një testim i të gjithë mësimdhënësve, po flas për komunën e Gjakovës”, është shprehur ajo duke shtuar se duhen motivuar drejtorët për t’i vlerësuar mësimdhënësit.
“Nuk është që (drejtorët) përtojnë por mendoj që duhet me i motivu për shkak se vlerësimi shkon në të mirë të të gjithëve dhe po besoj që shumë shpejt kemi për të filluar edhe ne të insistojmë te drejtorët e shkollave që të kenë vlerësime më të shpeshta në klasa… Mendoj që deri nga fundi i vitit mund ta bëjmë njëfarë dallimi mes vitit të kaluar dhe fillimvitit të këtij viti me vlerësimet që do të bëhen të drejtorëve në orët e mësimdhënësve”, shtoi ajo gjatë emisionit “Kallxo Përnime”.
Sindikata e Bashkuar e Arsimit, Shkencës dhe Kulturës (SBASHK) vazhdimisht e kundërshtuar idenë për testimin me shkrim të mësimdhënësve të Kosovës, duke vlerësuar se kjo ide është ofenduese ndaj mësimdhënësve pasi që janë të diplomuar dhe janë vlerësuar gjatë studimeve nga profesorët.
Ministrja e Arsimit, Shkencës, Teknologjisë dhe Inovacionit, Arbërie Nagavci tha dy ditë me parë se në mbledhjen e 99 të Qeverisë, është votuar komisionin intervistues, për rekrutimin e 20 inspektorëve dhe shumë shpejt do të hapet konkursi, raporton KosovaNews.
Inspektorati i arsimit deri tash ka funksionuar me kapacitete shumë të limituara, me vetëm 30 inspektorë të cilët mbulojnë tërë Republikën e Kosovës.
“Fokusi ynë është që rekrutimi të bëhet sipas 7 fushave të kurrikulës arsimore, duke plotësuar vendet e lira me kuadrin që e kemi në mungesë. Edhe për vitin e ardhshëm kemi planifikuar të pranojmë 20 inspektorë tjerë të arsimit”, tha ajo.
Nagavci tha se me rritjen e numrit të inspektorëve të arsimit synojnë, të sigurojnë cilësi në arsim, mandej që institucionet të jenë më afër problemeve në shkolla.
Sipas saj, me shtimin e numrit të inspektorëve do të ketë më shumë mundësi të monitorohen e inspektohen institucionet arsimore, për rrejdhojë të vlerësohet edhe performanca e mësimdhënësve, drejtorëve dhe zv. drejtorëve si dhe performanca e shkollës.
Mes tjerash, ministrja Nagavci tha se me qasje gjithpërfshirëse e shumë dimensionale do të përmirësohet cilësia në arsim.
