Dy persona janë plagosur si pasojë e të shtënave ne armë në Fshatin e Ri të Vitisë, ndërsa është arrestuar një i dyshuar.
Lajmin e ka konfirmuar për “Betimi për Drejtësi“, Ismet Hashani, zëdhënës i Policisë për rajonin e Gjilanit.
“Me datën 08.08.2024 në ora 10:07, Stacioni Policor në Viti ka pranuar informacion se në Fshatin e Ri, komuna e Vitisë ka të shtëna me armë zjarri si pasojë e të cilave janë plagosur dy persona. Njësitet policore relevante me urgjencë i janë përgjigjur rastit dhe nga hetimet e para mësohet se dy persona meshkuj kosovarë si pasojë e këtyre të shtënave janë plagosur. Të njëjtit pas marrjes së ndihmës së parë qendra e mjekësisë familjare në Pozheran janë transferuar në Spitalin Rajonal të Gjilanit ku aktualisht po trajtohen”, konfirmoi Hashani.
Ai shtoi se sipas mjekut kujdestar, të plagosurit për momentin janë jashtë rrezikut për jetë.
“Njësitet Policore kanë identifikuar dhe arrestuar një person mashkull kosovar, po ashtu në vendin e ngjarjes janë konfiskuar edhe dy armë zjarri. Hetues policor nga njësiti i hetimeve në koordinim me Prokurorin e Shtetit aktualisht janë duke punuar për ndriçimin dhe sqarimin e të gjitha rrethanave të rastit”, tha zëdhënësi Hashani.
