Dy aksidente të rënda kanë ndodhur gjatë natës së të enjtes në Podujevë, konkretisht njëri në fshatin Gllamnik dhe tjetri në fshatin Llugë të Podujevës.
Në aksidentin e parë një këmbësor është aksidentuar nga një veturë në lëvizje, me ç’rast ka marr lëndime të rënda trupore.
Lajmin e ka konfirmuar zëdhënësja e Policisë së Kosovës për rajonin e Prishtinës, Flora Ahmeti.
“Rreth orës 22:00 kemi marrë informatën për një aksident trafiku në fshatin Gllamnik të Podujevës, ku kanë qenë të përfshirë një automjet dhe një këmbësor. Në aksident lëndime të rënda ka pësuar këmbësori. Me rastin po merret njësiti i trafikut”, ka thënë Ahmeti.
Ndërsa në fshatin Lluga raportohet se ka ndodhur një vetaksident, ku tre persona kanë marrë lëndime trupore.
Deri tani zyra për informim e Policisë së Kosovës për këtë rast nuk ka dhënë detaje.
