Në njoftimin për media thuhet se Drejtori i Përgjithshëm i Doganës së Kosovës, Agron Llugaliu ka njoftuar Ambasadorin Hargreaves për rolin dhe arritjet e bëra nga ky institucion, duke e falemnderuar për mbështetjen që Britania e Madhe ka ofruar Doganës së Kosovës në avancimin e kapaciteteve.
“Gjithashtu, Llugaliu e informoi Ambasadorin për kontributin e rëndësishëm të Doganës Britanike në lehtësimin e bashkëpunimit rajonal, si dhe për rezultatet e rëndësishme të arritura midis Doganës së Kosovës dhe autoriteteve britanike në luftën kundër kriminalitetit që prek vendet tona”, thuhet në njoftimin për media.
Ndërkaq në njoftim thuhet se ambasadori Hargreaves ofroi vazhdimin e bashkëpunimit dhe e përshëndeti drejtorin Llugaliu për përparimin e arritur nga Dogana e Kosovës.
Dy palët u pajtuan për vazhdimin e bashkëpunimit të frytshëm dhe shkëmbimit në dobi të vendeve tona.
