Drejtori i Agjencisë për Parandalim të Korrupsionit (APK), Yll Buleshkaj, tha se ka një rritje të madhe të transparencës nga ana e zyrtarëve publikë.
Këtë deklarim, Buleshkaj e bëri të premten në tryezën e organizuar nga Lëvizja FOL me temën “Ndikimi i korrupsionit në negociatat për anëtarësimin e Kosovës në Bashkimin Evropian”.
Ai gjithashtu tha se pa transparencë është shumë problem të parandalohet korrupsioni.
“Kemi një rritje më të madhe të transparencës të zyrtarëve publikë. Pa transparencë është tepër problem të parandalohet korrupsioni. Në qoftë se nuk i tregojmë publikut se çfarë po tregojmë, qoftë përmes deklarimit të pasurisë, apo përmes parandalimit të konfliktit të interesit apo përmes fuqizimit të mekanizmave të sinjalizimit si mekanizëm i ruajtjes së integritetit të brendshëm dhe po ashtu si mekanizëm i raportimit të jashtëm të shkeljeve potenciale, do të thotë pa transparencë është e pamundur të ketë ndonjë sukses”, tha drejtori i agjencisë.
Buleshkaj po ashtu potencoi se, nëse te qytetarët e vendit ekziston mendimi se ka nivel të lartë të korrupsionit në Kosovë, atëherë duhet të jetë shqetësuese.
“Për sa kohë ekziston perceptimi se ka nivel të lartë të korrupsionit, është shqetësuese për neve si agjenci dhe po besoj për të gjitha institucionet. Për sa ekziston ajo në mendjen e qytetarëve, për sa kohë ekziston në mendje, ekziston realisht aty”, tha tutje ai.
Drejtori i Agjencisë për Parandalim të Korrupsionit në mes të tjerash theksoi se jemi në rrugë të mirë, por sipas tij, shqetësuese është krahasimi me vendet e tjera rajonale.
Sipas tij, vendet rajonale janë shumë më keq se Kosova sa i përket korrupsionit, ndërsa sipas tij ka standarde të dyfishta dhe se Komisioni Evropian nuk është i sinqertë me Kosovën në këtë aspekt.
“Jemi duke i ngritur kapacitetet, jemi në rrugë të mirë. Ajo që është shqetësuese për ne është kur po krahasohemi me vendet e rajonit të cilat progresojnë shumë më shpejt në integrimin evropian, ndërsa kur i shohim shërbimet apo nivelet e korrupsionit, i cili është niveli i prekshëm për qytetarët, janë shumë më keq. Do të thotë ka një, të paktën duket, se ka standard të dyfishtë. Nuk është Komisioni Evropian i sinqertë me ne, ka standarde të dyfishta. Secili qytetar që e kalon kufirin tonë, në qasjen e parë që ka me institucionet e sundimit të ligjit e vëren dallimin që është në Kosovë dhe jashtë, qoftë nga policia e vendit apo dogana e vendit”, u shpreh ai.
Sipas tij, në Kosovë ka institucione të cilat kanë kryer punë fantastike gjatë këtij viti.
“Ka institucione që kanë kryer punë fantastike gjatë vitit. E kemi rastin e Inspektoratit Policor që ka marrë masa të jashtëzakonshme, që kanë marrë masa për të ruajtur integritetin dhe për të parandaluar korrupsionin. Kjo nuk ndodh në vendet e tjera, ku është epidemik ky zhvillim”, shtoi ai.
Lëvizja FOL të premten ka organizuar tryezën me temë diskutimi “Ndikimi i korrupsionit në negociatat për anëtarësimin e Kosovës në Bashkimin Evropian”, aktivitet ky në kuadër të “Javës Kundër Korrupsion 2023”, e cila organizohet me moton “Bashkë kundër Korrupsionit”, nga Koalicioni i Organizatave të Shoqërisë Civile, i përbërë nga Instituti i Kosovës për Drejtësi (IKD), Lëvizja FOL dhe Iniciativa për Progres (INPO).
Java Kundër Korrupsion organizohet falë mbështetjes së Departamentit të Shtetit Amerikan – Byrosë për Çështje të Narkotikëve Ndërkombëtarë dhe Zbatimit të Ligjit (INL).
