Me 20 mijë euro ka qenë e gjobitur Partia Socialdemokrate (PSD) nga Agjencia për Informim dhe Privatësi (AIP), për “përpunim të kundërligjshëm të të dhënave personale”.
Kjo parti një muaj më parë përmes një aksioni simbolik, pati vendosur para ndërtesës së Qeverisë së Kosovës, 205 mijë nënshkrimet e peticionit të vitit 2016 kundër marrëveshjes për Asociacionin e komunave me shumicë serbe.
Më këtë akt PSD ka bërë shkelje të privatësisë së qytetarëve dhe për këtë arsye AIP e ka gjobitur me 20 mijë euro.
E tashmë ky subjekt politik është dorëzuar dhe ka paguar gjysmën e gjobës.
Lajmin për pagesë e ka bërë të ditur vetë Dardan Molliqaj, kryetari i PSD-së përmes rrjetit social Facebook.
Molliqaj ka deklaruar se pagesën e kanë bërë brenda 15 ditëve dhe në këtë mënyrë kanë paguar vetëm gjysmën e shumës.
“Nga 44 donatorë për pak ditë u arrit shuma prej 11,778.25 euro. Përgjigja e aktivistëve e qytetarëve ishte shumë e shpejte prandaj jemi të ngazëllyer dhe shumë falënderues”, u tha në njoftim.
Ndërsa Molliqaj po ashtu e ka konsideruar këtë gjobë absurdë në shumë drejtime.
Por, Agjencia për Informim dhe Privatësi (AIP) pati reaguar ndaj aksionit të zhvilluar nga ana e Partisë Socialdemokrate.
Madje kjo agjenci në reagimin e saj i bëri thirrje kësaj partie që të mos shpalos të dhëna personale të qytetarëve të Kosovës.
“Agjencia për Informim dhe Privatësi u bën thirrje subjekteve mediatike/portaleve, ashtu si edhe qytetarëve që përdorin rrjetet sociale, të respektojnë kuadrin ligjor në fuqi në mbrojtjen e të dhënave personale, që gjatë transmetimit apo njoftimit me lajmin të mos publikojnë të dhënat personale të qytetarëve që gjenden në listat e shpërndara, duke aplikuar efektet e mjegullimit”, thuhej në reagimin e AIP.
