Drejtoresha e Punës dhe Mirëqenies Sociale në Prizren, Vjollca Kabashi, ka njoftuar se ka dhënë dorëheqje nga pozita e drejtorit të këtij dikasteri në Prizren, raporton KosovaNews.
Lidhur me arsyetimin dorëheqjes Kabashi ka njoftuar se është kërcënuar nga kryetari i Prizrenit, Shqir Totaj, shefi i kabinetit të tij Nehat Elshani dhe drejtori i Shërbimeve Publike Çelë Lamaj, për të nënshkruar një pagesë që sipas Kabashit ishte e kundërligjshme.
“Shpreh indinjatën time të thellë që nga e enjëta deri të premtën në ora 13:20minuta lidhur me një pagese që për mua është e kundërligjshme duke më shantazhuar e duke më kërcënuar se unë të shkarkoj dhe jam detyruar të nënshkruaj nën presion dhe kërcenim me urdhëra të kryetari Shaqir Totaj, shefit te kabinetit Nehat Elshani dhe drejtorit të Drejtorisë të Shërbimeve Publike Çelë Lamaj. “, ka shkruar Kabashi.
E këtë rast, Kabashi ka thënë se iu ka drejtuar stacionit të policisë
“Pas detyrimit të nënshkrimit nën kërcënim mbrenda zyrës së kryetarit, i dërgova email përsëri kryetarit ku lidhur me këtë rast i njoftova dhe u drejtova në stacionin policor ku dhashë deklaratë në njësitin e krimeve ekonomike në Prizren për të gjitha keto parregullsi.”, ka thënë Kabashi.
Në njoftimin e saj, ajo është shprehur se për dhjetë muaj sa ishte në detyrë, më shumë i ka dhënë siç ka thënë ajo, llogari shefit të kabinetit sesa kryetarit të komunës.
“Për 10muaj asnjëherë nuk jam pritur nga kryetari për kërkesat që i kam bërë për takim. Duke u bazuar në ligjin e vetëqeverisjes lokale unë llogari për punën time është dashur ti jap vetëm Kryetarit të Komunës dhe qytetarëve.E në rastin konkret më shumë i kam dhënë llogari shefit të kabinetit sesa kryetarit të komunës. “, ka thënë ajo.
Ndër të tjerash, Kabashi ka deklaruar se është injoruar nga kryetari Totaj që prej marrjes së detyrës si drejtoreshë në e Mirëqenies Sociale.
“Sigurisht që, kur e kam marrë detyrën , kam qenë e vetëdijshme për sfida e vështirësi të natyrës së punës por për këto 10muaj nuk gjeta bashkëpunim dhe gatishmëri për punët që na pritnin në këtë drejtori.Përkundër faktit dhe kërkesave të mia të vazhdueshme për bashkëpunim me kryetarin kërkesat e mia janë injoruar, ku kam pritur për 5muaj që vendimet ti nënshkruaj kryetari i komunës. “, ka thënë ajo.
Kabashi e dëshpëruar nga qeverisja e Shaqir Totajt të PDK-së, ka thënë se ka punuar për ndryshimin në Prizren, por sipas saj, ka ndodhur e kundërta.
“Kam besuar dhe punuar për ndryshimin në Prizren dhe e kam pranuar detyrën e Drejtoreshës së Punës dhe Mirëqenies Sociale duke besuar në mirëqeverisje, dhe për ti shërbyer qytetarëve dhe familjeve që kanë nevoje pasi drejtoria që unë e kam udhëhequr është drejtoria më e ndjeshme sepse ka të bëjë me familjet nevojtare. Besova që kryetari Totaj pas emërimit do të jetë mbështetës dhe shtytës kryesor i mirëqeverisjes ndërsa ndodhi e kundërta si burokracia dhe nepotizmi.”, është shprehur Kabashi.