Pasi janë pezulluar nga puna katër zyrtarë të Institutit të Mjekësisë Ligjore (IML) për shkak të zhdukjes së mostrave të Astrit Deharit dhe sot ushtruesi i detyrës së drejtorit në IML, Dr Naim Uka dha dorëheqje morale, është caktuar personi që do të drejtojë këtë institucion.
Pas zhvillimeve të fundit dhe suspendimeve e dorëheqjes, KosovaNews mëson se për të drejtuar Institutin e Mjekësisë Ligjore (IML) është caktuar doktor Ditor Haliti.
Deri tani Haliti ka mbajtur pozitën e u.d udhëheqësit të Divizionit për Identifikim, Koordinim dhe Përkrahje dhe tashmë me vendim të Ministrisë së Drejtësisë caktohet zëvendësues i Drejtorit të Përgjithshëm të Institutit të Mjekësisë Ligjore (IML).
Vendimi ka hyrë në fuqi menjëhërë dhe Haliti tani obligohet që detyrat dhe përgjegjësitë t’i kryej në pajtim me legjislacionin përkatës në fuqi.
Ministrja e Drejtësisë, Albulena Haxhiu, ka thënë se të mërkurën në mbrëmje kanë kuptuar se janë zhdukur mostrat e Astrit Deharit nga Laboratori i toksikologjisë.
Në një konferencë të jashtëzakonshme për media të mbajtur të enjten Haxhiu ka thënë se tre persona kanë pasur qasje në laborator, ndërsa ende nuk dihet saktë se kur mund të jenë marrë mbi 10 mostra nga laboratori.
Për pasojë janë pezulluar nga puna katër zyrtarë të Institutit të Mjekësisë Ligjore dhe pezullimi i tyre është bërë me vendim të Komisionit Disiplinor të Institutit për Mjekësi Ligjore.
“Pas pranimit të informacionit të zhdukjes së mostrave të Astrit Deharit, në Institutin e Mjekësisë Ligjore, Komisioni Disiplinor i Institutit për Mjekësi Ligjore/ Ministria e Drejtësisë, mori vendim për pezullim nga puna të zyrtarëve: Nardi Sheqergjiu, Toksikolog Mjekoligjor në Institutin për Mjekësi Ligjore Flutura Goga, Udhëheqëse e Laboratorit të Toksikologjisë në Institutin për Mjekësi Ligjore Anila Lakna, Teknike e Laboratorit të Toksikologjisë në Institutin për Mjekësi Ligjore Ilirjana Shala, Kimiste në Institutin për Mjekësi Ligjore. Vendimi ka hyrë në fuqi me 8.12.2022”, thuhej nga Ministria e Drejtësisë.
Ndërkaq sot Naim Uka ka dhënë dorëheqje nga pozita e zëvendësdrejtorit në Institutin e Mjekësisë Ligjore.
Në letrën e dorëheqjes që ka siguruar KosovaNeës, rreth arsyjeve të dorëheqjes Uka thotë se ndjen përgjegjësi morale rreth rastit të zhdukjes së mostrave të Astrit Deharit në këtë institucion.
“Duke i’u referuar situatës së krijuar në Institutin për Mjekësi Ligjore, dhe duke pasur parasysh përgjegjësin hierarkike institucionale nga pozita e Zv.Drejtorit të Institutit për Mjekësi Ligjore, e ndjej si obligim moral të jap DORËHEQJE TË PAREVOKUESHME”, thuhet në letrën e dorëheqjes.
Pas raportimit se mostrat e Astrit Deharit janë zhdukur nga laboratori i Institutit të Mjekësisë Ligjore (IML), konkretisht nga laboratori i toksikologjisë, Prokuroria Speciale e Kosovës tashmë ka nisur hetimet.
Astrit Dehari ka vdekur më 5 nëntor të vitit 2016 teksa po mbahej në Qendrën e Paraburgimit në Prizren, si i dyshuar për sulmin ndaj ndërtesës së Kuvendit, në gusht të vitit 2016./KosovaNews
