Dogana e Kosovës ka njoftuar se gjatë një kontrolli rutinë në Zonën Doganore të Aeroportit – Cargo është zbuluar një sasi e konsiderueshme mbathjesh sportive për meshkuj, të cilat mbanin shenjat dalluese të disa prej brendeve më të njohura ndërkombëtare.
Pas ekzaminimit të detajuar, është verifikuar se produktet ishin të falsifikuara dhe përbënin shkelje të të drejtave të pronësisë intelektuale (DPI).
Në përputhje me dispozitat ligjore dhe procedurat e përcaktuara në Kodin Doganor dhe të Akcizës (KDAK), mallrat e falsifikuara janë asgjësuar në mënyrë të kontrolluar nën mbikëqyrjen e zyrtarëve doganorë.
Ndërkohë, ndaj subjektit përgjegjës janë marrë masat ligjore përkatëse për përfshirje në tregti të ndaluar dhe cenim të pronësisë intelektuale.
Dogana ka theksuar se mbetet e përkushtuar në luftën kundër kontrabandës dhe falsifikimeve, duke mbrojtur pronësinë intelektuale dhe interesat e konsumatorëve.
