Kryemistri i Kosovës, Albin Kurti ka ritheksuar tri pikat kryesore të cilat i ka diskutuar të enjten gjatë takimit që zhvilloi në Bruksel me përfaqësuesin e Lartë të Bashkimit Evropian për Politikë të Jashtme dhe të Sigurisë Josep Borrel dhe emisarin e tij special për Ballkanin dhe dialogun ndërmjet Kosovës dhe Serbisë, Miroslav Lajçak.
Kurti përmes një statusi në rrjetin social Twitter tha se gjatë takimit ka dhënë dëshmi për rrëmbimin e tre policëve të kidnapuar nga forcat serbe në territorin e Kosovës.
Po ashtu ai tha se ka diskutuar për de-përshkallëzimin e situatës në veri si dhe për zgjedhjet e reja dhe zbatimin e plotë të marrëveshjes.
Kurti po ashtu u shpreh se presidenti i Serbisë, Aleksandar Vuçiq ka refuzuar të marrë pjesë në këtë takim.
“U takova me Josep Borrell dhe Miroslav Lajcak, por jo me presidentin e Serbisë, i cili refuzoi të marrë pjesë. Unë dhashë dëshmi për rrëmbimin e tre policëve tanë – të mbajtur për më shumë se një javë – dhe diskutova de-përshkallëzimin, zgjedhjet e reja dhe zbatimin e plotë të Marrëveshjes Themelore”, ka shkruar Kurti në Twitter.
Met w/ HR/VP @JosepBorrellF & EUSR @MiroslavLajcak, but w/o Serbia's president, who refused to take part. I gave evidence on the abduction of our 3 policemen—held for over a week now—and discussed de-escalation, new elections, and full implementation of the Basic Agreement. pic.twitter.com/VefLMPXiLD
— Albin Kurti (@albinkurti) June 23, 2023
Ndryshe, Qeveria e Kosovës të enjten dha detaje lidhur me takimin e së enjtes në Bruksel mes kryeministrit Albin Kurti dhe Përfaqësuesit të Lartë të Bashkimit Evropian për Politikë të Jashtme dhe të Sigurisë Josep Borrel dhe emisarin e tij special për Ballkanin dhe dialogun ndërmjet Kosovës dhe Serbisë, Miroslav Lajçak.
Siç njofton Zyra e Kryeminsitrit, nuk pati takim trilateral siç ka ndodhur zakonisht, për shkak se pala tjetër, presidenti serb, Aleksandar Vuçiq ka refuzuar një gjë të tillë.
