Diplomatët amerikanë dhe rusë zhvilluan bisedime në Stamboll, të enjten, për të diskutuar normalizimin e funksionimit të ambasadave të tyre përkatëse pas shumë vitesh që dëbuan diplomatët e njëri-tjetrit.
Zëdhënësi i Kremlinit, Dmitry Peskov, tha se bisedimet në Stamboll pasuan një mirëkuptim të arritur gjatë telefonatës së presidentit Donald Trump me presidentin rus, Vladimir Putin, si dhe bisedimeve midis diplomatëve të lartë rusë dhe amerikanë dhe zyrtarëve të tjerë të lartë në Arabinë Saudite, raporton AP.
Bisedimet SHBA-Rusi të javës së kaluar në Riad shënuan një ndryshim të jashtëzakonshëm në politikën e jashtme të Uashingtonit nën drejtimin e Trump dhe një largim të qartë nga përpjekjet e udhëhequra nga SHBA për të izoluar Rusinë për luftën e saj në Ukrainë.
Në Riad, diplomatët amerikanë e rusë ranë dakord të fillojnë punën për t’i dhënë fund luftës dhe për të përmirësuar lidhjet e tyre diplomatike dhe ekonomike. Kjo përfshin rivendosjen e personelit në ambasadat, të cilat vitet e fundit u goditën rëndë nga dëbimet reciproke të një numri të madh diplomatësh, mbylljet e zyrave dhe kufizime të tjera.
Një zyrtar i ambasadës së SHBA-së, në Ankara, konfirmoi se bisedimet e së enjtes në Stamboll do të trajtonin çështjet që prekin funksionimin e misioneve diplomatike përkatëse.
Valentina Matvienko, kryetarja e Dhomës së Lartë të parlamentit rus, tha të enjten gjatë një vizite në Turqi se bisedimet SHBA-Rusi duhet të ndihmojnë në rivendosjen e “punës së plotë të misioneve tona diplomatike”.
“Unë jam e sigurt se marrëveshjet do të arrihen dhe ne do t’i rikthehemi komunikimit të civilizuar, i cili u ndërpre nga administrata e mëparshme,” tha ajo në Ankara, sipas agjencive ruse të lajmeve.
Para administratës së dytë të Trump, lidhjet midis Moskës dhe Uashingtonit ranë në nivelet e tyre më të ulëta që nga Lufta e Ftohtë pasi Rusia aneksoi ilegalisht Krimenë nga Ukraina në 2014 dhe pushtoi Ukrainën në 2022.
