Zëdhënësi i Qeverisë së Kosovës, Përparim Kryeziu, ka reaguar ashpër ndaj një kronike të publikuar mbrëmë nga Klan Kosova, duke e cilësuar atë si “dezinformatë të qëllimshme”.
Sipas Kryeziut, televizioni ka paraqitur të gjitha shpenzimet e institucioneve publike si “shpenzime të Qeverisë Kurti”, ndonëse raporti i publikuar qartësisht përfshin shpenzimet e të gjitha institucioneve, përfshirë komunat, agjencitë, Kuvendin, Presidencën dhe Qeverinë.
“Kronika e mbrëmshme e Klan Kosovës qëllimshëm ia faturon të gjitha shpenzimet ‘Qeverisë Kurti’, përkundër faktit se aty bëhet fjalë për shpenzimet e të gjitha institucioneve publike… E them qëllimshëm sepse raporti, të cilit i referohet kronika, e qartëson se aty paraqiten shpenzimet e institucioneve qendrore dhe lokale të vendit”, ka shkruar ai.
Kryeziu thekson se këto nuk janë “shpenzime luksi”, siç u paraqitën në kronikë, por shpenzime të domosdoshme për funksionimin e institucioneve kyçe të vendit, përfshirë Policinë, Forcën e Sigurisë së Kosovës, si dhe shpenzimet për ngrohjen e shkollave, që hyjnë në kategorinë e karburanteve dhe lëndëve djegëse.
Ai e akuzon Klan Kosovën për tentativë për të krijuar perceptim të rremë tek qytetarët:
“Tendenca për t’i ngjyrosur këto si shpenzim luksi, por edhe për t’ia faturuar gjithë shumën vetëm qeverisë qendrore, përbën dezinformatë të qëllimshme dhe nuk i shërben informimit të saktë e të drejtë të qytetarëve”, ka deklaruar Kryeziu.
Reagimi i tij vjen në një periudhë kur debati publik për mënyrën e përdorimit të mjeteve buxhetore ka qenë intensiv, ndërsa qeveria dhe institucionet po përballen me kritika të ndryshme mbi transparencën financiare.
