Mbledhja e Komisionit Hetimor Parlamentar lidhur me menaxhimin e marrëdhënies së punës të anëtarëve të Shërbimit të Jashtëm dhe zyrtarëve të Ministrisë së Punëve të Jashtme dhe Diasporës, e planifikuar të mbahej sot, ka dështuar për shkak të mungesës së deputetëve të pozitës.
Në rendin e ditës ishte paraparë të diskutohej niveli i menaxhimit të marrëdhënies së punës dhe angazhimi i ekspertëve në këtë fushë.
Kryetarja e Komisionit, Time Kadrijaj, ka shprehur zhgënjimin e saj për mungesën e vazhdueshme të interesimit nga ana e deputetëve të pozitës, duke theksuar se kjo është hera e tretë brenda javës që mbledhja shtyhet.
Ajo ka theksuar se përgjegjësia për sabotimin e punës së Komisionit bie mbi deputetët e Lëvizjes Vetëvendosje (LVV).
“Brenda kësaj javë tri herë është shty. Janë email-at janë komunikimet që i kemi bërë, në mënyrë që me i përshtatë ti kemi prezent këtu, por po shihet që s’ka interesim. Ne do të vazhdojmë me thirr prapë sepse nuk kom dashtë faji të më mbetet mu. Po i ftoj ashtu siç e kam obligim ligjor do ti thërras. Në qoftë se ata dëshirojnë ta sabotojnë është përgjegjësi e LVV. Kjo është tendencë që mos të zbardhet e vërteta se çfarë po ndodh në ministrinë e Punëve të Jashtme”, ka deklaruar Kadrijaj.
Sipas Kadrijajt, në mbledhjen e sotme ishte paraparë të diskutohej për CV-të e ekspertëve dhe të votohej për angazhimin e tyre.
“Në mungesë të kuorumit, detyrohem ta mbyll këtë mbledhje”, ka përfunduar ajo.
