Përfaqësuesi i sovranistëve kroatë në Parlamentin e Kroacisë, Marijan Pavliçek, ka thënë të mërkurën se nga tetori i vitit 2022, shumë shtetas kroatë, të cilët janë edhe shtetas të Serbisë, kanë marrë ftesa për rekrutim në lidhje me mobilizimin e mundshëm të Ushtrisë së Serbisë nëse ka luftë në Kosovë, raporton “Oslobodjenje.ba”, përcjell KosovaNews.
“Në mesin e atyre që kanë marrë ftesa për mobilizim janë edhe punonjës të Ministrisë së Punëve të Brendshme të Kroacisë, policë kroatë. Me sa dimë, të paktën 15 policë kroatë nga administrata policore e Osijek-Baranjës dhe Vukovar-Srijem kanë marrë ftesa, pasi kanë shtetësi të dyfishtë”, ka thënë Pavliçek në një fjalim në Kuvend.
Ai thotë se kanë informata se një polic kroat që ka edhe shtetësi serbe i është përgjigjur ftesës dhe ka rënë në kontakt me Ushtrinë e Serbisë dhe ka marrë udhëzimet se si duhet të sillet në rast mobilizimi.
Pavliçek ka thënë se kjo përbën shkelje të sigurisë.
“Drejtoria e Policisë nuk e ka njoftuar publikun kroat për këtë rast. Liderët e partisë së Pavarur Demokratike Serbe në Kroaci (SDSS) janë përfshirë në këtë për ta mbuluar këtë rast, sepse bëhet fjalë për një pjesëtar të minoritetit serb në afërsi të Vinkovicit”, tha Pavliçek.
Ai tregoi se personi në fjalë është pezulluar nga detyra dhe është në pritje të procedurave disiplinore.
Ai po ashtu tha se si ministri i Brendshëm i Kroacisë, Davor Bozhinoviq dhe ai i Jashtëm, Gordan Grliq Radman, nuk e kanë komentuar rastin, e thotë se për këtë është dashur t’i dërgohet notë proteste Serbisë.
Pavlçiek po ashtu ka thënë se ka tre muaj që Kroacia nuk ka drejtues të Agjencisë së Inteligjencës së Sigurisë Ushtarake (VSOA) dhe se po ka dështime në të gjitha nivelet e sigurisë.
