Kritikave të partive politike opozitare për situatën e krijuar së fundi në Kosovë, e të cilat në masë të madhe po e fajësojnë Qeverinë Kurti, u ka dhënë një përgjigje deputeti i Kuvendit të Kosovës nga radhët e Lëvizjes Vetëvendosje, Artan Abrashi.
Ai në këtë rast ua ka numëruar partive të ish- pushtetit ato çfarë bën deri sa qeverisnin me Kosovën.
“Deri dje, krerët e mafisë së veriut i keni pritur në zyret e shtetit. Keni promovuar ide për amnistimin e krimeve të luftës. Keni bërë biznes me kriminelët e veriut. E keni hequr nga agjenda shtrirjen e sovranitetit në veri. Keni nënshkruar sistem gjyqësor e energjetik paralel. Komunat e veriut i keni quajtur dhurata të Rankoviqit. Keni negociuar ndarjen e Kosovës”, ka përmendur disa nga ato që Abrashi prenton se i kanë bërë përgjatë viteve partitë që tani janë në opozitë.
Ai porositi që sot, nëse nuk e keni kurajon ta mbështesni Kryeministrin në betejën e tij për rend e ligj në veri, më e pakta do të ishte heshtja.
“Por, pa pikë dinjiteti e pendese, dilni dhe e kundërshtoni atë. Sepse, sikur ata banditë të veriut, edhe juve vetëm pushteti ju intereson. Njëjtë si atyre, as që ju bën për shtetin e Kosovës”, ka shkruar Abrashi.
Sipas tij, pasojat e politikave e vendimeve të dëmshme nuk sanohet lehtë e shpejt, por shtrirja e sovranitetit, sundimi i ligjit e demokracia nuk kanë alternativë.
“Sepse Republika nuk është fjalë goje e tubimeve rrahagjokse, por dinjitet shtetëror e qytetar për të cilin punohet përditë. Në fund, do të fitojë e drejta, do të fitojë Republika e Kosovës, e ju do të dilni humbës”, ka thënë mes tjerash deputeti i Vetëvendosjes.
