Deputeti i Kuvendit të Kosovës nga radhët e Lëvizjes Vetëvendosje, Mefail Bajqinovci ka reaguar gjatë ditës së sotme ndaj një shkrimi që ka publikuar Gazeta “Insajderi”, ku shkruhet për ngritjen në pozitë të bashkëshortes së deputetit.
Por këtë aludim të gazetës në fjalë e ka përgënjeshtruar vetë deputeti Bajqinovci, i cili ka publikuar edhe një dokument me të cilin demantohet shkrimi.
“Nga shpifja në shpifje: Lloji i “gazetarëve” që vëllaun i cili jeton në Kanada ma patën punësuar në KEK, sot paskan shpifur për bashkëshorten time. Për të gjithë publikun, pas lajmit të pavërtetë nga gazeta “Insajderi.org” për “avancimin” e bashkëshortes time, dua të sqaroj se bashkëshortja ime pozitën e Kryeinfermieres në Patologji-QKUK e ka mbajtur nga viti 2016 deri sot (më poshtë Vendimi i bashkëngjitur së bashku me vendimin dhe kontratën e punës)”, ka shkruar në reagimin e tij Bajqinovci.
Sipas dokumentit del që bashkëshortja e Bajqinovcit në këtë pozitë është emëruar para 7 viteve, respektivisht si U.D. kryeinfermierës në klinikën e Patologjisë në QKUK.
“Pra, nuk ka pasur asnjë lloj avancimi e aq më pak ndikimi, sepse thjesht është vazhduar mandati i saj përmes një konkursi të brendshëm për pozitën e Kryeinfermieres së Repartit të Patologjisë, që bashkëshortja ime e ka ushtruar që nga viti 2016 deri më sot. Ndërsa në këtë klinikë është e punësuar në vitin 1999”, ka sqaruar tutje Bajqinovci.
Ai vlerëson se gazeta në fjalë ka bërë një tekst plotësisht të pavërtetë, në hyrje të të cilit qysh në fjalinë e parë më cilësojnë “pushtetar të famshëm”, ndërkohë që Bajqinovci sqaron se nuk mban asnjë pozitë ekzekutive, “shpifin se bashkëshortja ime s’do të jetë infermiere e thjeshtë dhe se është “avancuar nga mamie në kryeinfermiere”.
“Këtë shpifje mundohen ta ndërtojnë mbi ndonjë supozim fiktiv që e tërheqin si paralele në publik, duke e përmendur mundësinë e ndikimit nga unë, vetëm e vetëm që shpifja e tyre të marrë kuptim. Prandaj të njëjtën e kanë mveshur me potencialin e gjasës si dekorim për shpifjen me të cilën duan ta dezinformojnë opinionin publik dhe ta dëmtojnë personalitetin tim me akuza të paqena për nepotizëm”, ka shkruar ai.
Deputeti Bajqinovci ka shtuar se është e turpshme lehtësia për të nxjerrë shpifje të tilla kaq të ulëta dhe të përsëritura dhe për këtë shpifje të gazetës “Insajderi.org” do t’i drejtohet KMSHK-së dhe do ndërmarr hapa të mëtutjeshëm.
