Kuvendi i Kosovës e ka filluar seancën e jashtëzakonshme, ku po diskutohet për kërkesën e Qeverisë së Republikës së Kosovës, për zgjatjen e masave emergjente në furnizimin e energjisë edhe për 30 ditë.
Me të filluar seanca ministrja e Ekonomisë, Artane Rizvanolli ka kërkuar nga deputetët që ta votojnë propozim-vendimin e Qeverisë për zgjatjen të masave.
“Për herë të parë shpalljen masave emergjente Qeveria e ka kërkuar në gusht. Meqë situata me energji nuk është përmirësuar qeveria ka marrë vendim për zgjatje edhe dy herë nga 30 ditë. Qeveria ka miratuar vendimin për zgjatjen e sërishme të masave. Duke marrë parasysh krizën energjetike në Evropë, Qeveria i kërkon Kuvendit zgjatjen e masave emergjente për furnizim me energji”, ka theksuar Rizvanolli.
Por partitë opozitare kanë pasë verëtje e kritika për mënyrën si po bëhet zgjatja e masave emergjente të furnizimit me energji.
Komisioni për Ekonomi e ka shqyrtuar propozim-vendimin e Qeverisë për zgjatjen e masave emergjente për furnizim me energji dhe Kuvendit ia ka rekomanduar miratimin e tij, ka thënë deputeti i PDK-së, Ferat Shala.
Shala ka thënë se nga Qeveria nuk është marrë asnjë hap tjetër pos ai për shpalljen e gjendjes emergjente.
“Unë pajtohem që nuk ka ndryshim të gjendjes në tregun energjetik por nuk ka ndryshim as të menaxhimit. Neni 25 i cili po keqpërdoret i ligjit për energji e jep mundësinë e shpalljes së jashtëzakonshme. Por aty janë nenet pasuese për moskeqpërdorim të gjendjes. Aty thuhet se kur Kuvendi e vlerëson që ministrja dhe qeveria nuk po gjejnë zgjidhje hyn në fuqi pika 4 e nenit 25. Aty thuhet se Ministria pas marrjes së masave ka obligim nxjerrjen e akteve ligjore për krijimin e legjislacionit sekondar, por asnjë veprim nuk është marrë deri më tash te qeveria në këtë drejtim, vetëm shpallje te gjendjes emergjente dhe asgjë tjetër”.
Kurse deputeti i Lidhjes Demokratike të Kosovës, Besian Mustafa, ka thënë se Qeveria ka sjellë paralizë.
Sipas tij, Qeveria qe një vit e më shumë të vetmin veprim që ka marrë është shpallja e gjendjes emergjente dhe asnjë përfitim për qytetarët.
“U shpenzuan mbi 100 milionë euro për energjinë elektrike dhe ende nuk kemi asnjë dritë në fund të këtij tuneli. Në mes të gushtit filluan reduktimet e energjisë imagjinoni çka do të ndodhë në fund të këtij muaji e në shkurt e mars me reduktime”, ka thënë ai.
Sipas tij, nuk është asnjë projekt, por sipas tij vetëm krizë kronike energjetike, vetëm gjendje emergjente dhe asnjë opsion.
Po ashtu edhe deputeti i AAK-së, Pal Lekaj, ka kritikuar Qeverinë për masat lidhur me krizën energjetike.
Ai në seancën e jashtëzakonshme në Kuvend për këtë temë ka thënë se Qeveria ka eksperimentuar me masat emergjente.
Ka fajësuar se nuk ka bashkëpunim me opozitën.
“Në emër të Grupit Parlamentar nuk di si ta komentoj këtë tentim vendim të qeverisë. Qysh nga fillimi i qeverisjes Kurti nga mosdija për udhëheqje është eksperimentuar në baza emergjente. E nderuar qeveri, lidhur me këtë temë keni mospërputhje të njohjes së konceptit emergjent sepse është e 6-ta herë që e shpallni këtë gjendje. Tregojuni qytetarëve që nuk bashkëpunoni me opozitën”.
Lekaj ka shtuar se Qeveria nuk e ka marrë seriozisht gjendjen me energjinë.
“Tregojuni që jeni qeveri e hajgareve. Tregojuni si të flenë si lahen, si të vishen e si t’i izolojnë shtëpitë. Për fat te keq për Kosovën kjo qeveri nuk ka lidhur kontratat jashtë shtetit për furnizim me energji. Përballë të gjitha këtyre problemeve vendimi më i mirë është që ta quajmë ministri apo Qeveri emergjente”.
