Pasi goglat e vendosën Shqipërinë përballë Italisë, Spanjës dhe Kroacisë, pozicionimi i ekipeve në grupe përcaktoi edhe kalendarin e ndeshjeve.
Në finalet e Euro 2024, kuqezinjtë do të debutojnë më 15 qershor kundër Italisë, kampione të Europës në fuqi. Ndeshja do të zhvillohet në ditën e dytë të evenimentit në Gjermani dhe do të luhet në stadiumin e Dortmundit.
Kombëtarja zbret në fushë përballë të kaltërve në orën 21:00 të mbrëmjes, ndërsa më përpara, në orën 18:00 do të ndeshen dy ekipet e tjera të Grupit B, Spanja dhe Kroacia.
Sipas kalendarit të përcaktuar, ndeshja e dytë e kuqezinjve do të luhet më 19 qershor. Shqipëria do të zbresë në fushë kundër Kroacisë në Hamburg, me përballjen që do të nisë në drekë, prej orës 15:00.
Për shkak të zhvillimit të tre ndeshjeve në ditë, përballja tjetër e grupit, ndërmjet Spanjës dhe Italisë, do të luhet një ditë e gjysmë më pas, më saktësisht mbrëmjen e datës 20 qershor.
Pas debutimin me Italinë, Kombëtarja e luan ndeshjen e fundit në grupet e Euro 2024 me Spanjën. Takimi është përcaktuar të luhet në Dysseldorf, në datën 24 qershor, prej orës 21:00.
Sipas rregullores ndeshjet e fundit në grupe luhen në të njëjtën ditë dhe në të njëjtin orar, duke bërë që paralelisht në fushë të zbresin edhe Kroacia me Italinë.
