Atalanta ka triumfuar ndaj Romës në kuadër të xhiros së 36-të në Serie A me rezultat 2-1 për të siguruar pjesëmarrjen në Ligën e Kampionëve për sezonin e ardhshëm.
Ndeshja nisi më mirë me skuadrën vendase që vetëm pas nëntë minutave lojë kaluan në epërsi.
Charles De Ketelaere asistoi te Ademola Lookman i cili shënoi një gol të bukur për 1-0.
Megjithatë mysafirët nga kryeqyteti italian arritën të barazonin rezultatin në minutën e 32-të, kur Matias Soule asistoi te Bryan Cristante i cili barazoi shifrat në 1-1.
45 minutat e para të ndeshjes u mbyllën me rezultatin baras 1-1.
Edhe pjesa e dytë ishte shumë e zjarrtë me dy skuadrat që krijuan raste të mira shënimi.
E zëvendësuesi Ibrahim Sulemana doli të jetë vendimtar për vendasit, duke shënuar në minutën e 76-të një gol të bukur nga distanca për 2-1.
Deri në fund përkundër përpjekjeve të mysafirëve gola më nuk pati dhe ndeshja u mbyll 2-1 për Atalantën.
Atalanta tanimë blindon pozitën e tretë në tabelë me 71 pikë, derisa Roma mbetet e gjashta në tabelë me 63 sosh.
Ndeshjen e radhës Atalanta e zhvillon në udhëtim te Genoa, derisa Roma në Olimpico pret Milanin.
