Komisioni Evropian të hënën ka paralajmëruar se incidentet antisemitike në të gjithë Evropën kanë arritur “nivele të jashtëzakonshme” gjatë ditëve të fundit.
Zëdhënësi i Komisionit Evropian, Christian Wigand, ka renditur disa nga incidentet e tilla si: koktejëmolotovët e hedhura në një sinagogë në Gjermani, yjet e Davidit të vizatuara në ndërtesat e banimit në Francë, një varrezë hebreje e përdhosur në Austri, dyqanet dhe sinagogat hebreje të sulmuara në Spanjë, demonstruesit duke brohoritur slogane urrejtjeje kundër hebrenjve, e shumë raste të tjera, të cilat i ka cilësuar “akte të neveritshme”, teksa u kërkoi vendeve të BE-së dhe qytetarëve që ta ndalojnë këtë rritje të antisemitizmit.
Wigand ka theksuar gjithashtu se është vënë re një rritje e incidenteve anti-myslimane. Ai ka shtuar se janë duke e rritur zbatimin e legjislacionit përkatës për të siguruar që platformat në internet të reagojnë me shpejtësi dhe në mënyrë efektive ndaj përmbajtjeve antisemitike ose anti-myslimane në internet.
Sipas tij është përgjegjësia e të gjithëve si evropianë që të bëjnë thirrje kundër urrejtjes në të gjitha format./AP
