Në çështjen gjyqësore ndaj Hashim Thaçit, Kadri Veselit, Rexhep Selimit dhe Jakup Krasniqit, mbrojtja e ish-Presidentit Thaçi, ka thënë se nuk do të mbështetet në dëshminë e tre dëshmitarëve të cilët kanë kodet 1DW-002, 1DW-010 dhe W04174.
Për dëshmitarin 1DW-002, Prokuroria ka thënë që nuk e kundërshton pranimin e deklaratës së tij, por me kushtin që ai të jetë në dispozicion në sallën e gjyqit për ballafaqim, raporton “Betimi për Drejtësi“.
Ky parashtrim i Prokurorisë, kishte ardhur pas mbrojtja e Thaçit kishte kërkuar pranimin e deklaratës së këtij dëshmitari sipas Rregullës 153.
Sipas Prokurorisë, ky dëshmitar është thirrur nga si nga mbrojtja e Krasniqit ashtu edhe nga ajo e Thaçit. Që të dy mbrojtjet, thuhet se kanë kërkuar që dëshmia e dëshmitarit në fjalë, të pranohet me shkrim në vend që të merret në pyetje në mënyrë të drejtpërdrejtë në sallën e gjyqit.
Kjo praktikë është përdorur edhe në tribunale tjera penale, thekson Prokuroria. Dhe sipas tyre, si procedurë nuk cenon të drejtat e të akuzuarve dhe është në përputhje me qasjen fleksibile të Panelit për zhvillimin paralel të rasteve të mbrojtjeve.
Për më tepër, Prokuroria thekson se Rregulla 153 ka për qëllim thjeshtimin dhe përshpejtimin e procedurës, por në këtë rast, ajo nuk do të sillte ndonjë kursim real kohe, pasi dëshmitari do të paraqitet gjithsesi për t’u pyetur nga Paneli.
Së fundi, edhe po të shqyrtohej kërkesa e mbrojtjes veçmas, Prokuroria thotë se pa marrë parasysh rrethanat e tjera, ajo duhet të refuzohet, sepse natyrën dhe qëllimin e deklaratës së dëshmitarit 1DW-002 nuk e bëjnë të përshtatshme për pranim sipas Rregullës 153.
Prokuroria thekson se fakti që provat e propozuara lidhen me vërtetimin e një çështjeje tjetër përveç sjelljes së të akuzuarve, nuk çon në pranimin e saj pasi ajo ende i nënshtrohet kritereve të zakonshme të pranueshmërisë.
Sipas Prokurorisë, deklarata e këtij dëshmitari përmban gjashtë fjali përmbajtjesore që lidhen ekskluzivisht me një çështje e cila është e redaktuar dhe se nuk përmban asnjë informacion lidhur me pozita apo aktivitetet e tij gjatë periudhës së aktakuzës apo edhe për marrëdhënien e tij me të akuzuarit.
Prandaj, sipas Prokurorisë, do ishte e nevojshme që të bëhej vlerësimi i besueshmërisë së dëshmitarit duke marrë parasysh se ai ka mbajtur pozita dhe ka pasur kontakte me të akuzuarit.
Si rrjedhojë, Prokuroria thotë se pranimi i dëshmisë së këtij dëshmitari duhet të kushtëzohet me paraqitjen e tij në sallën e gjyqit, në mënyrë që ata të jenë në gjendje ta marrin në pyetje.
Ky parashtrim i Prokurorisë ishte bërë më 17 shtator 2025, por u bë publik pothuajse pas një muaji, saktësisht më 13 tetor 2025.
Ndërsa, më 10 tetor 2025, mbrojtja e Thaçit e përfaqësuar nga avokati Luka Mishetiq ka njoftuar se nuk do të mbështetet në dëshminë e këtij dëshmitari e po ashtu as në dëshminë e 1DW-010 dhe W04174.
Veç kësaj, mbrojtja tha se miratimi i autorizimit për dëshmitarin 1DW-007 është vonuar me arsyetimin e mbylljes së përkohshme të Qeverisë të Shteteve të Bashkuara të Amerikës.
Megjithatë, mbrojtja ka njoftuar në parashtrimin e 10 tetorit 2025 se pret miratimin për këtë dëshmitar dhe se ky do të jetë dëshmitari i fundit i thirrur nga mbrojtja.
Mbrojtja ka filluar me paraqitjen e provave të saj më 15 shtator 2025, ku për tri ditë me radhë u dëgjua ish-ndihmësi i sekretarit amerikan të shtetit, James Rubin.
Ndërsa, pas tij u thirr ish-këshilltari ligjor i delegacionit shqiptar në Rambuje, Paul Williams. Kurse, ish-këshilltari politik i komandantit të lartë të NATO-s, Wesley Clark, John Stewart Duncan filloi dëshminë më 22 shtator dhe e mbaroi më 23 shtator 2025.
Kurse, më 30 shtator nisi dëshminë James Peter Covey, ish-zëvendës i përfaqësuesit të OKB-së në Kosovë, Bernard Kouchner. Covey e përfundoi dëshminë më 2 tetor.
Më 14 shtator 2025, në Hagë u mbajt një protestë masive në përkrahje të ish-krerëve të UÇK-së, ku morën pjesë qytetarë nga të gjitha trojet shqiptare e mërgimtarë të shumtë.
DhSK-ja ka bërë të ditur se 14 nëntori 2025 është caktuar si datë për përfundimin e çështjes së mbrojtjes në këtë rast, kurse parashtresat përfundimtare të procesit dhe deklaratat mbi ndikimin e krimeve të pretenduara tek viktimave që marrin pjesë në procedurë planifikohen të paraqiten deri më 22 dhjetor 2025.
Ndërkohë, më 15 prill 2025, Prokuroria ka njoftuar se ka përfunduar paraqitjen e provave në këtë rast.
Ndërsa, mbrojtja kishte bërë kërkesë sipas Rregullës 130, e cila parasheh kërkesën për rrëzimin e ndonjë akuze apo akuzave në tërësi në aktakuzë. Vendimi mbi këtë kërkesë ishte marrë më 16 korrik 2025. Sipas kryetarit të trupit gjykues, Charles Smith III, ajo që kishte kërkuar mbrojtja ishte mosmbështetja në pretendime për krime lufte që kanë të bëjnë me incidente që kanë ndodhur para majit të 1998-ës dhe pas 20 qershorit të 1999-ës.
“Trupi gjykues vëren se incidentet dhe ngjarjet që kanë ndodhur në kohën që kundërshtohen prej mbrojtjes nuk janë akuza brenda kuptimit të Rregullës 130”, tha kryetari i trupit gjykues, Charles Smith III.
Si rrjedhojë, ishte rrëzuar ky mocion me arsyetimin se trupi gjykues s’e ka autoritetin për të rrëzuar materiale që përbëjnë akuzat që kanë të bëjnë me shkaqe kohore. Ndërsa, po të njëjtën ditë, mbrojtja e viktimave kishte paraqitur provat e veta duke thirrur dy dëshmitare eksperte për të dëshmuar njëkohësisht.
Përveç që dëshmuan më 16 korrik 2025, dëshmia e këtyre dy dëshmitareve vazhdoi edhe më 17 korrik 2025, duke përfunduar kështu edhe marrja e dëshmive të dëshmitarëve të mbrojtjes së viktimave.
Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.
Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.
Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.
Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020.
