Kryetari i Podujevës, Shpejtim Bulliqi ka reaguar pas përplasjes që ndodhi mes tij dhe asamblistit të LDK’së, Ekrem Rrahmani në Kuvendin Komunal, ditë më parë.
Bulliqi përmes një postimi në Facebook, thotë se asamblistët e LDK-së tentuan dhe të sulmojnë fizikisht, pasi nuk u bë e mundur të ndërrohet anëtari në Komitetin për Komunitete, i cili thuhet se ka dalë nga Grupi i LDK-së.
Po ashtu, kryetari i Podujevës shprehet se njerëzit e LDK-së, po vazhdojnë të shpifin lidhur me këtë rast. Ai ka thëne se nuk është në natyrën e tij që të reagojë, por po detyrohet për shkak të shpifjeve të vazhdueshme që po bëhen nga njerëzit e LDK-së në Podujevë. Për shkak se edhe pas katër vjetësh kur e humbën pushtetin në Podujevë (dhe tri pas zgjedhjeve të 2021-s) nuk po mund të pajtohen se nuk i kanë privilegjet e pushtetit të cilat i keqpërdorën për 20 vjet, e vetmja gjë që u ka mbetur është arroganca, shpifjet e sjelljet aspak parlamentare, siç ndodhi në seancën e ditës së djeshme nga asamblisti Rrahmani.
“LDK le t’i vazhdon shpifjet, fyerjet e dezinformatat edhe viktimizimet siç është mësuar, sepse këtë askush nuk e bën më mirë se ta, e ne do të vazhdojmë t’i kryejmë punët tona për çka na kanë zgjedhur qytetarët. Do të vazhdojmë të punojmë pareshtur për t’i realizuar projektet e mëdha në dobi të qytetarëve, siç kemi bërë për këto katër vjet”, shkruan Bulliqi.
“Për hir të opinionit publik dhe për shkak se e vërteta po mundohet të devijohet nga njerëzit e LDK-së, e në disa raste edhe mediat po bien pre e këtyre dezinformatave, dua të sqaroj krejt çfarë ndodhi dje në seancë”, ka thënë kryetari Bulliqi.
