Kryeministrja serbe Ana Brnabic i ka shkruar koment presidentes së Kosovës, Vjosa Osmani në Twitter.
Në një replikë ndaj statusit të Osmanit, kryeministrja serbe shpreh inatin e saj ndaj drejtuesve të shtetit të Kosovës, sidomos për kryeministrin Albin Kurti.
Brnabiq mes tjerash thekson se serbët po mbrojnë të drejtat e tyre dhe do të fitojnë, ndërsa Kurti, sipas saj do të dështojë.
“Së fundi (!), jam plotësisht dakord me znj. Osmani: demokracia dhe shteti i së drejtës do të mbizotërojnë. Prandaj janë barrikadat. Serbët po mbrojnë të drejtën e tyre për të votuar (të cilën ju e hoqët), të drejtën për një gjykim të drejtë (të cilën ju e keni mohuar) dhe Marrëveshjen e Brukselit. Ata do të triumfojnë dhe Kurti do të dështojë”, shkruan Brnabiq.
Finally (!), I fully agree with Ms.Osmani: democracy & the rule of law WILL prevail. Hence the barricades. Serbs are protecting their right to vote (which you took away), right to a fair trial (which you’ve denied), and the Brussels Agreement. They will prevail & Kurti WILL fail. https://t.co/oIZTja9uir
— Ana Brnabic (@anabrnabic) December 27, 2022
Përveç Osmanit, sulmet ndaj gazetarëve në veri i ka dënuar edhe ambasadori amerikan në Kosovë, Jeff Hovenier. Shoqata e ndryshme evropiane të gazetarëve përveç se kanë dënuar sulmet, kanë kërkuar më shumë siguri gjatë raportimit nga veriu.
Serbët lokalë që 18 ditë kanë ngritur barrikada në veri, në shenjë pakënaqësie me arrestimin e ish-policit serb të Kosovës, Dejan Pantiq.
Institucionet e Kosovës kanë thënë se Pantiq dyshohet për organizimin e sulmit të 6 dhjetorit ndaj zyrtarëve të Komisionit Qendror të Zgjedhjeve në veri.
Që kur janë ngritur barrikadat, në veri të Kosovës janë shënuar një numër i incidentesh me armë zjarri, granata dore dhe shok bomba. Bandat e dirigjuara nga Beogradi kanë sulmuar si policët e Kosovës, në disa raste edhe ato të KFOR-it dhe EULEX-it.
Sulme kanë pësuar edhe gazetarët e mediave të ndryshme që kanë përcjell zhvillimet në veri.
Policia e Kosovës ka shtuar prezencën e saj në veri të Kosovës, duke thënë se synon të garantojë siguri për të gjithë qytetarët.
Autoritetet në Kosovë kanë thënë se “bandat kriminale që mbështeten nga Serbia” qëndrojnë pas barrikadave. Qeveria e Kosovës ka thënë se shteti ka kapacitete që t’i heqë barrikadat, por i ka dhënë kohë misionit të NATO-s në Kosovë, KFOR, që të heqë barrikadat.
