Përdorimi i aplikacionit të rrjetit social kinez TikTok është ndaluar në telefonat dhe mjetet tjera të ministrave dhe shërvbyesve civilë në Mbretërinë e Bashkuar.
Ministri i Zyrës së Kabinetit Oliver Dowden u tha deputetëve se aplikacioni do të ndalohej për arsye sigurie me efekt të menjëhershëm, shkruan BBC.
Ai e përshkroi atë si një lëvizje “paraprake”, por “të matur” pas një rishikimi nga Qendra Kombëtare e Sigurisë Kibernetike.
TikTok ka mohuar me forcë akuzat se i dorëzon të dhënat e përdoruesve qeverisë kineze.
Dowden tha: “Siguria e informacionit të ndjeshëm të qeverisë duhet të jetë e para”.
Por, ai u tha deputetëve se ndalimi nuk do të shtrihej në telefonat personalë të ministrave apo shërbyesve civilë apo publikut të gjerë – sepse ky ishte një përgjigje ndaj një “rreziku specifik me pajisjet qeveritare”.
“Sidoqoftë, siç ndodh gjithmonë, ne i këshillojmë individët që të bëjnë kujdes në internet dhe të marrin parasysh politikat e të dhënave të çdo platforme të mediave sociale përpara se t’i shkarkojnë dhe përdorin ato.”
Zëvendësudhëheqësja e Punës, Angela Rayner e mirëpriti ndalimin, por akuzoi qeverinë se ishte “prapa kurbës”.
Si Downing Street ashtu edhe Ministria e Mbrojtjes kanë llogari në TikTok – dhe Ministria e Mbrojtjes ngarkoi në llogarinë e saj të enjten në mëngjes një video të një tanku Challenger 2, një lloj që furnizohej në Ukrainë.
Ai i tha BBC-së se do të vazhdojë të përdorë TikTok midis një “game të gjerë kanalesh dixhitale… për të promovuar punën e Forcave të Armatosura dhe për të komunikuar mbështetjen tonë për Ukrainën”.
“Procese të fuqishme janë vendosur për të siguruar që pajisjet tona janë të sigurta, duke përfshirë menaxhimin e rreziqeve nga aplikacionet e palëve të treta. Informacioni ynë më i ndjeshëm mbahet në një sistem të veçantë,” shtoi një zëdhënës.
Ministrat e qeverisë së Mbretërisë së Bashkuar janë nën presion nga deputetë të lartë për të ndjekur Shtetet e Bashkuara dhe Komisionin Evropian në ndalimin e aplikacionit.
SHBA e ndaloi TikTok nga pajisjet zyrtare në dhjetor dhe Komisioni ndoqi shembullin muajin e kaluar. Kanadaja, Belgjika dhe India kanë ndërmarrë veprime të ngjashme.
