Përfaqësuesi i Lartë i Bashkimit Evropian për Politikë të Jashtme, Josep Borrell para takimit të 18 marsit me kryeministrin e Kosovës, Albin Kurti dhe presidentin serb Aleksandar Vuçiq, ka porositur palët që ta pranojnë propozimin evropian.
Përmes një postimi në Twitter ai ka thënë se takimi do të mbahet për të rënë dakord se si të zbatohet marrëveshja e propozuar nga Bashkimi Evropian.
Borrelli ka thënë se është koha që të përfundojë.
Ai ka thënë se për të hapur rrugën drejt arritjes së objektivit të anëtarësimit në BE, Serbia dhe Kosova duhet të normalizojnë marrëdhëniet, duke shtuar se nuk ka tjetër rrugëdalje.
“BE-ja ka bërë pjesën e saj dhe dialogu Beograd-Prishtinë është një pjesë qendrore e mandatit tim. Askush nuk tha se një detyrë kaq monumentale sa lehtësimi i një marrëveshjeje normalizimi do të ishte e lehtë. Ka pasur ulje-ngritje, dhe shumë shpesh çështjet e konsideruara të vogla dhe teknike janë dëshmuar shumë të ndjeshme dhe politike, me potencialin për t’u kthyer në të dhunshme”, ka shkruar ai.
Ai ka thënë se lufta e agresionit rus kundër Ukrainës ndryshoi pamjen. Sipas tij, dialogu nuk ka të bëjë vetëm me Kosovën dhe Serbinë. Shton se ai duhet parë në kontekstin aktual më të gjerë gjeopolitik, një moment përcaktues në historinë evropiane.
“Në shtator 2022, ne të mbështetur nga liderët e Gjermanisë dhe Francës dhe miqtë tanë amerikanë – i bëmë një propozim të guximshëm presidentit të Serbisë Vuçiq dhe kryeministrit të Kosovës Kurti. Një propozim që do t’i jepte fund menaxhimit të krizës dhe në vend të kësaj do të zhvendoste vëmendjen te normalizimi dhe pajtimi, dhe që do të ndihmonte të gjithë rajonin të kërcejë përpara drejt Evropës. Kjo është arsyeja pse tani është koha për t’u fokusuar në pamjen më të gjerë dhe për të mos lejuar që një dritare tjetër mundësie të mbyllet para syve”, ka thënë ai,
Borrelli ka shkruar se gjatë takimit të fundit të nivelit të lartë mes dy liderëve, të cilin e ka thirrur më 27 shkurt të këtij viti, ata ranë dakord se nuk nevojiten diskutime të mëtejshme për Propozimin e Bashkimit Evropian për rrugën e normalizimit të marrëdhënieve ndërmjet Kosovës dhe Serbisë, një dokument i miratuar nga 27 shtete anëtare të BE-së në takimin e Këshillit Evropian në shkurt.
“Kjo nuk është një arritje e vogël dhe një hap i rëndësishëm përpara. Por ende nuk është një punë e përfunduar. Kjo është arsyeja pse tani është koha për t’u fokusuar në pamjen më të gjerë dhe për të mos lejuar që një dritare tjetër mundësie të mbyllet para syve të njerëzve të rajonit, siç ka ndodhur disa herë në historinë e fundit”, ka shkruar ai.
Borrelli ka thënë se tani është koha që Serbia dhe Kosova të bien dakord për aneksin e zbatimit, i cili është pjesë integrale e Marrëveshjes dhe të ndajnë një mirëkuptim të qartë se si të zbatojnë dispozitat e tyre.
Ka shtuar se BE-ja është shtëpia përfundimtare për Serbinë dhe Kosovën.
Sipas tij, është koha që liderët e Kosovës, Serbisë dhe të gjithë Ballkanit Perëndimor të tregojnë guxim dhe të tregojnë përgjegjësi të përbashkët për suksesin e procesit të anëtarësimit në BE të rajonit.
