Përfaqësuesi i Lartë i BE-së për Politikë të Jashtme dhe Siguri, Josep Borrell, ka thënë se në New York sonte do të mbajnë një takim joformal me ministrat e jashtëm të shteteve anëtare të BE-së.
Borrell ka thënë se ndër të tjera ministrat do t’i informojë edhe për atë çfarë ndodhi më 14 shtator në Bruksel në takimin e nivelit të lartë në kuadër të dialogut Kosovë – Serbi.
Më 14 shtator në Bruksel nuk ishte arritur një dakordim në lidhje me sekuencimin e marrëveshjes së Brukselit. Borrell kishte thënë se kryeministri i Kosovës, Albin Kurti, nuk e kishta pranuar propozimin e Bashkimit Evropian, ndërsa presidenti i Serbisë, Aleksandar Vuçiq, e pranoi këtë.
Kurti ndërkohë akuzoi emisarin e BE-së për dialogun, Miroslav Lajçakun, për anshmëri. Ai tha se propozimi i BE-së iu tregua pas përfundimit të takimit, dhe kishte qenë propozimi të cilin zëvendëskryeministri Besnik Bislimi e kishte refuzuar në takimin me Lajçakun në korrik.
“Do të njoftojë ministrat për takimin e fundit të dialogut të nivelit të lartë, mes Kosovës dhe Serbisë, të shpjegojë se çfarë ndodhi dhe të shikojmë për zhvillimet e ardhshme në dialog”, ka thënë Borrell.
