Zëvendëskryeministri i Kosovës, Besnik Bislimi, ka deklaruar se gjatë 14 muajve në Bruksel asnjëherë nuk është diskutuar për Asociacionin.
Gjatë intervistës për televizionin publik, ai ka thënë se kjo temë më shumë diskutohet në media.
“Asociacioni është përmendur vetëm në takimet e mia kokë më kokë me z. Lajçak, ku unë kam kundërshtuar faktin se Brukseli me lehtësi del e prononcohet për nevojën e krijimit të Asociacionit, por nuk prononcohet për mosrespektimin e marrëveshjeve nga ana e Serbisë”, ka thënë Bislimi. “Janë dy marrëveshje për Asociacionin ajo e vitit 2013 dhe ajo e vitit 2015. Por marrëveshja për Menaxhimin e Integruar të Kufijve është nënshkruar më 2011. Nëse në Bruksel marrëveshjet nuk janë ranguar asnjëherë për nga rëndësia, atëherë pse bëhet temë Asociacioni e nuk bëhet temë Menaxhimi i Integruar i Kufijve. Përgjigja e Lajçakut ishte se ‘ju merreni në Kosovë dhe deklaroheni për të’. Ne deklarohemi sepse na bëjnë pyetje mediat. Dhe më shumë është interesim i mediave në Kosovë për këtë, sesa i takimeve në Bruksel”.
Sipas zëvendëskryeministrit të Kosovës, nuk mund të ketë as nuk do të ketë kompromis deri në njohjen reciproke.
Gjatë intervistës, Bislimi ka cituar Borrellin, shefin e BE-së për Politike të Jashtme e Siguri të BE-së, se çka ka shkruar ai në kërkesën e parë
“Shpenzimi i një viti kohë, duke u marrë me çështjet e së kaluarës, në vend se të merremi me peizazhin e madh dhe të ardhmen tonë, mendoj që është më se mjaftueshëm”, kishte shkruar Borrell, citoi Bislimi duke thënë se mund të mos jetë përkthim adekuat.
Ai tha se kjo nënkupton që ka ardhur koha që të mos merremi më me çështjet e kaluara, por me të ardhmen peizazhin e madh, pra marrëveshjen gjithëpërfshirëse.
