Komisioni Shtetëror i Zgjedhjeve në Shqipëri ka vendosur se të drejtën për të kërkuar regjistrimin e Partisë Demokratike për zgjedhjet vendore të 14 majit e ka Enkelejd Alibeaj, të cilit Lulzim Basha ia ka deleguar drejtimin e kësaj partie.
Edhe pse Lulzim Basha publikisht ka dhënë dorëheqje nga drejtimi i PD-së që nga marsi i vitit 2022, në gjykatë rezulton emri i tij si kryetar i kësaj partie.
Sali Berisha, që vitin e shkuar në një kuvend partiak, të pranuar e më pas kontestuar nga gjykatat, u zgjodh kryetar partie, nuk mund t’i regjistrojë kandidatët e tij nën emrin e Partisë Demokratike. Kjo situatë u krijua pasi të dy grupimet brenda partisë më të madhe opozitare në Shqipëri kërkojnë të njihet si Partia Demokratike zyrtare.
Përreth dy orë të enjten, në Komisionin Shtetëror të Zgjedhjeve u dëgjuan pretendimet e përfaqësuesve ligjorë të dy palëve.
Komisioneri Ilirjan Celibashi ka thënë se institucioni që ai drejton bazohet në Kodin Zgjedhor dhe Ligjin për partitë politike për të kryer regjistrimin e partive politike për pjesëmarrje në zgjedhje.
“E ka përcaktuar Ligji i partive politike dhe Kodi Zgjedhor, që përcakton se kush është organi që vendos për drejtimin e partive politike. Është gjykata dhe një dokument që vjen prej gjykatës që përcakton se kush është drejtuesi i një partie politike. Në nenin 9 të Ligjit për partitë politike thuhet se regjistrimi i partive bëhet në shkallën e parë të rrethit Tiranë, që mban edhe regjistrin e partive politike. Anëtarësia e një partie politike mund të njohin për drejtues të një partie këdo që ata çmojnë dhe vlerësojnë, por për ligjin dhe institucionet publike, përfshi edhe KQZ-në, ajo që merret në referencë është dokumenti zyrtar”, ka thënë Celibashi.
Ai ka deklaruar se sipas dokumenteve në gjykatë, kryetar i PD-së rezulton ende Lulzim Basha.
Kreu i Komisionit Shtetëror të Zgjedhjeve ka thënë se nuk mund të merret asnjë vendim bazuar në mbi perceptime dhe fakte publike, por vetëm mbi dokumentet zyrtare.
Pavarësisht se të drejtën për të regjistruar PD-në e ka Enkelejd Alibeaj, dokumentacioni i paraqitur ishte i paplotë. Prandaj, Komisioni Shtetëror i Zgjedhjeve dha 48 orë kohë për plotësimin e detajeve në dokumente, raporton rel.
Kriza e përfaqësimit të PD është krijuar në vitin 2021 kur Basha përjashtoi nga Grupi Parlamentar i PD-së dhe nga vetë partia ish-kreun e partisë, njëherësh ish-kryeministrin Sali Berisha, pas vendimit të Departamentit amerikan të Shtetit për ta shpallur Berishën person të padëshiruar (person non grata) për shkak të akuzave për korrupsion.
Vendimi nuk u pranua nga Berisha dhe mbështetës të tij, të cilët mblodhën struktura paralele duke i kërkuar anëtarësisë të votojë për forumet e reja të partisë si Kuvendi i Partisë Demokratike, Këshilli Kombëtar e të tjera, të cilat votuan Sali Berishën për kryetar partie, por edhe logon e re të PD-së.
Gjykata e shkallës së parë në Tiranë njohu si të ligjshëm Kuvendin Kombëtar të thirrur nga Berisha dhe të gjitha vendimet që u morën prej tij. Ky vendim u ankimua nga Enkelejd Alibeaj, si ushtrues detyre i Partisë Demokratike. Javën e kaluar Gjykata e Apelit vendosi që çështja të rigjykohet në shkallën e parë të gjyqësorit.
