Në kuadër të pjesëmarrjes në Javën e Nivelit të Lartë të Sesionit të 78-të të Asamblesë së Përgjithshëm të OKB-së, presidenti i Shqipërisë, Bajram Begaj, zhvilloi një takim me Përfaqësuesin e Lartë të Bashkimit Evropian, Josep Borrell. Ata diskutuan edhe për situatën në Kosovë për çka theksuan se palët duhet punojnë për hapat e tjerë për zbatimin e marrëveshjes bazike.
Sipas njoftimit të Presidencës së Shqipërisë, Begaj dhe Borrell theksuan se dialogu i ndërmjetësuar nga BE, dhe mbështetur nga SHBA-të, është e vetmja rrugë për të zbutjen e tensioneve në veri të Kosovës.
“Në takim, Presidenti i Republikës dhe Përfaqësuesi i Lartë i BE-së diskutuan edhe mbi situatën në Kosovë duke ritheksuar se dialogu i ndërmjetësuar nga BE dhe të mbështetur nga SHBA, është e vetmja rrugë për zbutjen e tensioneve në veri të Kosovës dhe normalizimin e marrëdhënieve midis Kosovës dhe Serbisë. Dialogu është gjithashtu rruga e domosdoshme për integrimin e Kosovës në BE. Bashkëbiseduesit vlerësuan me rëndësi që palët të punojnë së bashku për hapat e tjerë për zbatimin e Marrëveshjes së arritur mes dy vendeve në shkurt dhe mars 2023, si dhe të angazhohen në mënyrë konstruktive në takimet e ardhshme për dialogun”, thuhet në njoftim.
Në anën tjetër, Begaj shprehu vlerësimin për përkushtimin e Borrell për të mbajtur në fokus integrimin e rajonit “pavarësisht debateve dhe diskutimeve brenda BE-së”.
“Presidenti Begaj u shpreh shpresëplotë për pasjen sa më shpejt, të rezultateve të prekshme dhe konkrete në proceset integruese në hapjen e grup-kapitujve themelorë nëpërmjet konferencës së dytë ndërqeveritare dhe siguroi se Shqipëria do të vijojë me vendosmëri procesin e reformave të brendshme”, thuhet në njoftim.
