Shqipëria pritet që sot të kthehet në kryeqytetin e Evropës.
Ora 11:00 do t’i gjejë udhëheqësit e shteteve të BE dhe ata të rajonit të mbledhur nën ombrellën e Procesit të Berlinit, themeluar nga ish-kancelarja Angela Merkel dhe tanimë po çohet përpara prej pasardhësit të saj kancelarit Olaf Scholz.
Përveç prezantimit të një pakoje të re të investimeve nga Bashkimi Evropian, pritet të diskutohet edhe për sulmin në veri të Kosovës më 24 shtator, raporton rel dhe përcjell KosovaNews.
Kurse mediumi TCh ka analizuar elementët kyç të këtij samiti.
Sipas tij, dy janë elementët kryesorë për t’u analizuar në Forumin e Udhëheqësve të Procesit të Berlinit.
Së pari elementi politik.
Një prej shtyllave të Procesit të Berlinit themeluar në vitin 2014 është fqinjësia e mirë në rajon. E në këtë kontekst situata e tensionuar pas 24 Shtatorit në Veri të Kosovës është një temë për t’u diskutuar aq më tepër që në Tiranë nesër do të jenë dy arkitektët e planit Franko-Gjerman.
Presidenti Macron nuk do të jetë paraditen e të Hënës në Tiranë por ai do të vijë gjatë pasdites për të vijuar takimet bilaterale. Në kushtet kur Kancelari Sholz mbetet i vetëm, përjashtohet mundësia e një ndërmjetësimi prej tij e një takimi mes Macron-Sholz me Albin Kurtin dhe Aleksandër Vuçiç. Dhe nëse kjo do të ndodhë atëherë kjo do të jetë hera e parë e takimit mes tyre pas tentativës të një grupi terrosist për një aneksim të Veriut të Kosovës.
Aspekti i dytë dhe më i rëndësishmi, ai me karakter ekonomik.
Në 31 Maj 2023 nga forumi, GLOBSEC në Bratislavë Presidentja e Komisionit Europian, Ursula von der Leyen, njoftoi se BE është duke punuar për “New Plan Growth” ( Planin e ritjes) për vendet e rajonit por nuk dha shifra se ku konsiston ky plan në terma financiar.
Një burim diplomatik në Komisionin Europian tha për gazetarin e Top Channel Muhamed Veliu se “me gjasë nga Samiti Procesit të Berlinit, presidentja Ursula von der Leyen do të flasë me terma konkrekt për të ashtuquajturin “Plan i Rritjes”.
Bëhet fjalë për një paketë prej 28 miliardë euro:
– 2 miliardë për Planin e Rritjes
– 26 miliardë përmes fondeve IPA.
Kjo paketë do të jetë komplementare krahas asaj të deritanishme me 30 miliardë euro nga “Plani Ekonomik dhe i Investimeve” lancuar në 2020, nga i cili deri me tani janë investuar në projekte të ndryshme 16 miliardë.
Procesi i Berlinit është një nismë e ish-kancelares Angela Merkel të Gjermanisë në vitin 2014, për të ndihmuar në zhvillimin ekonomik të gjashtë vendeve të Ballkanit Perëndimor dhe në përafrimin e tyre me Bashkimin Evropian.
Kjo nismë shërben si një platformë për bashkëpunimin e nivelit të lartë ndërmjet përfaqësuesve zyrtarë të nivelit të lartë të së ashtuquajturës Gjashtëshja e Ballkanit Perëndimor, e cila përbëhet nga Shqipëria, Bosnje e Hercegovina, Mali i Zi, Kosova, Maqedonia e Veriut dhe Serbia. Procesi përfshin edhe institucionet e BE-së, institucionet financiare ndërkombëtare dhe shoqërinë civile në rajon.
