Zëdhënësi i Bashkimit Evropian, Peter Stano, ka konfirmuar se të dy kryenegociatorët i janë përgjigjur pozitivisht ftesës për takim. Ai ka thënë në konferencën për media të mërkurën se BE-ja pret nga dy shtetet që në frymë evropiane të dalin nga situata, që sipas tyre, paraqet krizën më të madhe ndër vite mes dy shteteve.
“Mund të konfirmoj se i kemi ftuar të dy kryenegociatort dhe mund të konfirmoj se kanë kthyer përgjigje se do të vijnë. Do të kemi takim me ta. Qëllimi është i njëjtë që më në fund të gjejmë një rrugëdalje nga situata aktuale, në frymë evropiane”, ka thënë Stano në konferencën për media.
Ai ka thënë se zakonisht pasi të ketë pajtim mes kryenegociatorëve, takimet përcillen nga takime në nivele të larta.
Stano e ka cilësuar krizën aktuale, “si më të madhen që është parë ndër vite” në raportet mes Kosovës dhe Serbisë.
ShBA-ja dhe partnerët tjerë ndërkombëtarë patën kërkuar që Kosova ta shtyjë për 10 muaj vendimin për ndëshkim të atyre që bartin targa ilegale të lëshuara nga Serbia dhe që refuzojnë t’i konvertojnë në RKS. Serbët në veri kanë dhënë dorëheqje në shenjë proteste, ndërsa çështja është diskutuar ditëve të fundit në nivel të krerëve të shtetit të Kosovës dhe Serbisë në Bruksel, por nuk është arritur marrëveshje. Nga ky takim, kryeministri i Kosovës, Albin Kurti, e ka akuzuar përfaqësuesin e Lartë të BE-së, Josep Borrell, për njëanshmëri.
ShBA-ja ka kërkuar edhe dy ditë shtesë për marrëveshjen dhe kjo është pranuar nga Qeveria e Kosovës.
Situata në veri është përmendur si arsye nga Presidenca Çeke e BE-së që të hiqet nga agjenda edhe çështja e liberalizimit të vizave.
