Bayern Munich dhe Inter nuk kanë zhgënjyer pritjet favorizuese për fitore në rrethin e tretë të Champions League.
Në ndeshjet e të martës “bavarezët” kanë triumfuar në Turqi kundër Galatasaray, ndërsa Inter ka korrur fitore kundër austriakëve të Salzburg.
Në “RAMS Park” të Stambollit skuadra e trajnerit Thomas Tuchel ka fituar me rezultat 1-3.
Gjermanët kanë gjetur epërsinë qysh në minutën e tetë me golin e Coman. Pas njëzet e tetë minutash turqit janë kthyer në lojë duke vendosur barazpeshën me golin e Icardi nga penalltia.
Pjesa e parë është mbyllur me këtë rezultat.
Pjesa e dytë ka qenë momenti kur mysafirët kanë treguar se nuk kanë bërë kilometra për t’u ndarë në paqe.
Fillimisht në minutën e shtatëdhjetë e tretë Kane ka rikthyer epërsinë e pastaj në minutën e shtatëdhjetë e nëntë Musiala ka shënuar golin e tretë për të fundosur shpresat turke. No description available.
Në ndeshjen tjetër në “Giuseppe Meazza” Inter ka dominuar Salzburg.
Rezultati përfundimtar ka qenë 2-1.
Ka qenë Sanchez ai i cili ka kaluar italianët në epërsi në minutën e nëntëmbëdhjetë.
Pjesa e parë s’ka njohur ndryshim rezultati.
Në pjesën e dytë, përkatësisht në minutën e pesëdhjetë e shtatë, austriakët kanë barazuar me golin e Gloukh.
Inter dukej e vendosur për arkëtimin e tri pikëve dhe këtë e ka dëshmuar Calhanoglu kur është treguar i saktë nga pika e bardhë.
Fitorja do të mund të ishte më e thellë sikur VAR të mos anulonte një gol të Martinez në dhjetëminutëshin e fundit të ndeshjes.
