Policia e Kosovës ka realizuar sot një aksion të gjerë në kuadër të hetimeve për rastin e “vrasjes së mbetur në tentativë”, që kishte ndodhur më 29 janar të këtij viti në rrugën “Mikel Marku” në Pejë.
Sipas njoftimit zyrtar nga Policia, Drejtoria Rajonale në Pejë, konkretisht Sektori Rajonal për Hetime, në bashkëpunim me Stacionin Policor në Deçan dhe njësitë e përforcuara nga drejtoritë rajonale në Gjakovë dhe Gjilan, ka realizuar sot (16 maj) një plan operativ, i cili ka përfshirë tetë bastisje në lokacione të ndryshme.
Gjatë këtij aksioni janë gjetur dhe sekuestruar: Tri armë zjarri, 19 fishekë dhe një jelek antiplumb.
Si rezultat i operacionit janë arrestuar dy persona të dyshuar, të cilët aktualisht po intervistohen nga hetuesit në prani të avokatëve mbrojtës.
Rasti në fjalë lidhet me një incident të ndodhur në fillim të këtij viti, ku ishte sulmuar një zyrtar policor jashtë detyrës zyrtare, ndërsa ishte raportuar edhe për të shtëna me armë zjarri. Policia kishte nisur hetimet menjëherë dhe kishte identifikuar disa të dyshuar, prej të cilëve disa ishin në arrati.
Policia e Kosovës njofton se hetimet janë ende në vazhdim, ndërsa thekson përkushtimin në luftimin e krimit të organizuar dhe sjelljen para drejtësisë të personave të përfshirë në vepra të rënda penale.
