Kryetari i Kuvendit të Kosovës, Dimal Basha, ka zhvilluar sot një takim me përfaqësuesit e Sindikatës së Pavarur të RTK-së dhe Shoqatës Sindikale të Radios së Kosovës, pas protestës së mbajtur nga punëtorët e këtij institucioni publik.
Basha ka bërë të ditur se fillimisht ka dalë për t’u takuar me protestuesit dhe më pas i ka pritur përfaqësuesit e tyre në Kuvend, ku kanë biseduar për gjetjen e një zgjidhjeje të drejtë për pagat e punëtorëve dhe funksionimin e qëndrueshëm financiar të RTK-së.
“Sot, gjatë protestës së Sindikatës së Pavarur të RTK-së dhe Shoqatës Sindikale të Radios së Kosovës, dola për t’i takuar protestuesit dhe më pas i mirëprita në takim përfaqësuesit e tyre në Kuvend. Biseda jonë u zhvillua me përkushtim dhe mirëkuptim, me synimin për të gjetur zgjidhje të drejtë për pagat e merituara të punëtorëve të RTK-së dhe për funksionimin e qëndrueshëm financiar të institucionit publik të transmetimit”, ka shkruar Basha.
Ai tha se, si kryetar i Kuvendit, ka dhënë mbështetjen e tij të plotë për zgjidhjen e kësaj situate, duke theksuar se tashmë ekziston mundësia ligjore për të vepruar në këtë drejtim.
Basha shtoi se në mbledhjen e parë të Kryesisë së Kuvendit ka kërkuar formimin e komisioneve parlamentare, në mënyrë që të hapet rruga për themelimin e Komisionit për Buxhet, i cili do të mund të miratonte raportin financiar të RTK-së dhe të mundësonte procedimin e mjeteve përmes Thesarit të Republikës së Kosovës.
Ai theksoi se përveç Lëvizjes Vetëvendosje, mbështetje për këtë proces kanë shprehur edhe përfaqësuesit e komuniteteve joshumicë joserbe dhe nënkryetari i Kuvendit, Nenad Rashiq.
Megjithatë, Basha ka theksuar se kjo mbështetje ende nuk është e mjaftueshme për funksionalizimin e komisioneve, pasi për themelimin e tyre kërkohet pjesëmarrja e më shumë se gjysmës së deputetëve dhe miratimi me shumicë të thjeshtë.
“Në frymë bashkëpunimi e mirëkuptimi, u bëj thirrje të gjithë deputetëve dhe subjekteve të tjera parlamentare që ta mbështesin këtë iniciativë, sepse votimi për komisione nuk është çështje politike, por çështje e funksionalizimit të institucionit publik të transmetimit dhe mirëqenies së rreth 700 familjeve që jetojnë nga puna dhe pagat e punëtorëve të RTK-së,” ka përfunduar Basha.
