Kryetari i Partisë Demokratike, Lulzim Basha u shpreh sot se “për PD-në është pa asnjë ekuivok imperative mbështetja pa kushte ndaj SPAK-ut”.
Në një konferencë për shtyp, Basha tha se “SPAK-u po shënjestrohet nga qeveria për shkak të hetimeve antikorrupsion”.
“Nëse qeveria nën ankthin e asaj që ka nisur, që është vënia para përgjegjësisë ligjore e zyrtarëve të lartë të qeverisë, ka ndërmend t’i përgjigjen me presion ndaj SPAK-ut, atëherë duhet të llogarisin në kundërshtimin më të fortë të Partisë Demokratike dhe të gjithë aleatëve tanë”, u shpreh ai.
Basha tha se “SPAK dhe Reforma në Drejtësi nuk janë perfekte, por janë i vetmi shans që ky vend ka njohur në 33 vite për t’i dhënë fund pandëshkueshmërisë”.
“Ndaj për PD-në, për mua, është pa asnjë ekuivok imperative mbështetja pa kushte ndaj SPAK-ut. Dhe duke thënë pa kushte, nuk është perfekt, por mbështetja me kushte është njësoj sikur pushteti i tretë t’i kthehet parlamentit apo qeverisë t’i thotë të kemi kapur në korrupsion, por hiq dorë nga politika. Pushtetet nuk janë aty që t’i vënë kushte njëri-tjetrit, janë që të balancojnë njëri-tjetrin në nivele kushtetuese. Në tërësi parlamenti ka të gjitha kompentencat që i nevojiten për të kontrolluar pushtetin e drejtësisë. Në qoftë se i ka kapur paniku nga hetimet e SPAK, urimi im është ju a shtoftë Zoti panikun. Kush ka panik nga hetimet e SPAK, ja shtoftë Zoti panikun, i lëntë pa gjumë. Në qoftë se s’keni panik, atëherë mënyrat për ta trajtuar këtë janë brenda rendit kushtetues. Nuk ka nevojë për të shpikur instrumente për të qetësuar frikën që disa kanë”, tha ndër të tjera Basha.
