Grupet e organizuara kriminale nga Serbia kanë depërtuar në një treg të ri fitimprurës të drogës për Rusinë, nga ku po zgjerojnë rrjetin e tyre të tregtarëve në vendet fqinje, sipas raportit të fundit të Agjencisë së Kombeve të Bashkuara për Drogën dhe Krimet për vitin 2023.
Kokaina është më e shtrenjtë në Rusi sesa në shumicën e vendeve të Evropës Perëndimore, por oferta e shtuar ka dërguar në një rënie të çmimeve, kështu që “pluhuri i bardhë” tani është gjithnjë e më i përballueshëm thuhet ne raportin e OKB.
Ndërsa më parë kokaina ishte e pranishme në qendrat më të mëdha dhe më të pasura tani ajo është përhapur në qytete të tjera më të vogla.
Sipas raporteve të Kombeve të Bashkuara, kokaina arrin në Rusi nga dy drejtime. Njëra është Evropa Perëndimore dhe transporti organizohet kryesisht nga grupe serbo-malazeze, por edhe nga shqiptarët që veprojnë tërthorazi – kur i porosit dikush, e sjellin mallin.
Qendra e shpërndarjes është Lituania, përmes së cilës kokaina shkon në Rusi.
Rruga e dytë, më serioze është ajo “thjesht serbe”, e cila është rruga e modifikuar ballkanike. Kokaina vjen në portet greke dhe turke, si dhe ato rumune dhe bullgare. Nga atje transportohet në Evropën Perëndimore “nga dera e pasme”, por gjithnjë e më shumë edhe në Rusi. Sasia e kokainës së kapur në Rumani dhe Bullgari është vazhdimisht në rritje, por edhe numri i përdoruesve.
Raporti i UNODC-së konfirmoi atë që tashmë ishte spekuluar, se kriminelët serbë fituan një avantazh në tregtinë e kokainës falë faktit se ata kishin kontakte të drejtpërdrejta me prodhuesit, kryesisht në Peru.
