Kryeministri i Kosovës, Albin Kurti ka bërë një reagim gjatë orëve të mbrëmjes ndaj sulmeve që kanë bërë grupet ekstremiste serbe ndaj gazetarëve.
Kreu i qeverisë tha se ngjarjet e sotme janë tregues se grupe ekstremistësh të kontrolluara nga Beogradi nuk e durojnë dot as policinë e as gazetarët.
“Policia e Kosovës i shërben drejtësisë dhe ligjit, gazetaria e Kosovës i shërben demokracisë dhe transparencës. Sot në Komunën e Leposaviqit nga bandat kriminale janë sulmuar gazetarët që ishin të pranishëm gjatë përpjekjeve të disa individëve për të shkaktuar trazira e dhunë”, ka shkruar Kurti në reagimin e tij.
Kameramani Bardh Bekteshi dhe gazetarja Dorentina Thaqi, kanë pësuar lëndime në kokë dhe trup. Kameramanët tjerë, Albin Rrahmani dhe Ardijan Shala kanë pësuar lëndime në trup. Në këmbë janë lënduar gazetaret, Laura Kerolli e Qendresa Sinani, kurse në krah ka marrë lëndime gazetari Pleurat Salihu.
Kryeministri u ka uruar shërim të shpejtë për kameramanët dhe gazetarët, ndërsa ka ftuar ndërkombëtaret që të mbajnë qëndrim.
“Ftojmë institucionet dhe diplomatët ndërkombëtarë të mbajnë qëndrim, dhe të mbështesin institucionet e Kosovës që të sjellin para drejtësisë të gjithë sulmuesit e Policisë së Kosovës, KFOR-it e sidomos gazetarëve”.
