Plagosja e policëve dhe arrestimi i Lushtakut, IPK tregon cilat janë të gjeturat
Një javë më parë rreth mesnatës një ngjarje e rëndë ka tronditur komunën e Skenderajt. Atje në një pikë kontrolli u plagosën dy policë të Kosovës, pasi disa persona i sulmuan si reagim i shqiptimit të një tikete të trafikut.
Deri tani për këtë ngjarje të dhunshme janë arrestuar disa persona dhe për përfshirje në rast është arrestuar e po mbahet në paraburgim edhe ish-nënkryetari i Skënderajt dhe ish- deputeti nga radhët e PDK-së, Nuredin Lushtaku me disa familjarë të tij.
Për këtë rast kanë folë edhe institucioni që merret me trajtimin e shkeljeve eventuale të pjesëtarëve policor, pra nga Inpektorati Policor i Kosovës (IPK).
Kryeshefi i IPK-së thekson se deri në këtë fazë të hetimeve mund të thuhet se policia ka qenë e sulmuar dhe pjesëtarët e saj kanë qenë të detyruar të përdorin forcën.
“Vlerësimi fillestar i prokurorit kujdestar dhe hetuesve ka qenë që në këtë fazë nuk ka dyshime për zyrtarë policor të përfshirë në vepra penale. Dhe në këtë moment që po flasim nuk ka dyshime për zyrtarë policor, atëherë është në kompetencë të Policisë të Kosovës dhe Prokurorisë që të zhvillojë më tutje hetimet. Ne jemi duke përcjellë si rast, në momentin që ka informacione dhe dalin prova që implikojnë zyrtarët policor në shkelje apo në tejkalim të forcës apo përdorim të armëve jashtë rregullave që parasheh Policia e Kosovës, sigurisht që do të kyçemi dhe do të ndërmarrim veprimet e nevojshme hetimore”, thekson Kushtrim Hodaj.
Pas arrestimit për rastin e një jave më parë – natës kur u plagosën dy policë, Prokuroria Themelore në Mitrovicë i ka kërkuar Gjykatës Themelore që t’ua caktojë masën e paraburgimit F.L. dhe A.L., të dyshuar për sulmin ndaj zyrtarëve policorë në Skenderaj.
Kjo kërkesë e prokurorisë është miratuar dhe Lushtaku po mbahet në paraburgim.
Lushtaku përballet me akuzat se së bashku me disa familjarë është i përfshirë në rastin e plagosjes së policëve.
Sipas njoftimit policor, atë natë u plagosën dy policë. Njëri nga policët ka marrë plagë nga arma e zjarrit derisa tjetri ka marrë lëndime nga mjetet e forta./KosovaNews/
