Edhe Policia e Kosovës demanton shkrimin e Paparacit: Ministri nuk ka kërcënuar askënd

Pas zëdhënësit të Lëvizjes Vetëvendosje, Arlind Manxhuka edhe Policia e Kosovës ka reaguar zyrtarisht ndaj një artikulli të publikuar sot në portalin Paparaci, ku pretendohet se Ministri i Punëve të Brendshme ka ushtruar presion dhe ka kërcënuar shefat e Policisë, për shkak se nuk ishte informuar për operacionin e madh antidrogë të zhvilluar më 3 qershor.

Në një sqarim për media, Policia e Kosovës e cilëson shkrimin si të pavërtetë, duke theksuar se përmban tri pretendime të pasakta: se ministri nuk ishte njoftuar për operacionin, se kishte pasur takim mes tij dhe shefave të policisë, dhe se kishte pasur përplasje apo presion në lidhje me operacionin.

Sipas Policisë, të gjitha veprimet janë ndërmarrë në përputhje me autorizimet ligjore, në koordinim me institucionet relevante të drejtësisë dhe me Ministrinë e Punëve të Brendshme.

Lexo po ashtu:

Operacioni i 3 qershorit ishte rezultat i një hetimi të udhëhequr nga Prokuroria Speciale, me urdhër të Gjykatës Themelore në Prishtinë dhe me mbështetje ndërkombëtare nga Belgjika, Franca, Holanda dhe Europoli. Si rezultat, u arrestuan 22 persona të dyshuar, u bastisën 47 lokacione dhe u konfiskuan dëshmi materiale.

Policia thekson se ministri është informuar me kohë për operacionin, por nuk ka pasur asnjë takim me shefat e Policisë, as para dhe as pas operacionit. Kjo mbështetet edhe nga fakti se ministri ndodhet jashtë vendit që nga ajo kohë.

“Komunikimi me Ministrinë e Punëve të Brendshme ka qenë i rregullt dhe brenda kuadrit ligjor. Nuk ka pasur as presion, as fjalosje, dhe as keqkuptime,” thuhet në reagimin e Policisë.

Policia e Kosovës apelon që publikime të tilla të pabazuara nuk i shërbejnë interesit të qytetarëve dhe as sigurisë publike, duke theksuar se operacionet e saj zhvillohen në përputhje me ligjin dhe me bashkëpunim të ngushtë vendor e ndërkombëtar.