Zyrtari paralel i komunës së Zveçanit, Dragan Nedeljkoviq, në një prononcim për media sot pretendoi se ka një marrëveshje mes Listës Srpska dhe KFOR-it për t’i liruar katër serbët e arrestuar dje për shkak të dhunës që ushtruan gjatë protestës. Po ashtu, ai pretendoi se deri në orën 15:00 pritet tërheqja e njësive speciale të Policisë së Kosovës nga ndërtesa e komunës së Zveçanit.
Por, këto deklarata të tij i ka demantuar Ministria e Punëve të Brendshme e Kosovës.
Zëdhënësja e MPB-së, Nora Fetoshi, në një përgjigje për KosovaNews tha se nuk qëndron asgjë prej kësaj deklarate.
“Jo. Nuk qëndron asnjëri lajm në atë artikullin që kanë publikuar më herët”, tha ajo.
Njëjtë edhe zyrtarë nga misioni paqeruajtës i KFOR-it në deklaratat e dhëna p[ë media kanë përgënjeshtruar këtë pretendim.
Ndërkohë Policia e Kosovës njoftoi më parë se po e menaxhon situatën e krijuar nga protestat e serbëve në veri, ndërsa tha se protestuesit dje kanë shfaqur dhunë deri në rrezikim të jetës së njerëzve, përfshirë jetën e zyrtarëve të institucioneve të sigurisë.
Në një komunikatë. drejtuar mediave, KFOR-i bëri të ditur se se 30 ushtarë janë plagosur të hënën në komunën e Zveçanit gjatë dhunës së protestuesve serbë.
Nga të plagosurit 11 janë ushtarë italian dhe 19 nga kontingjentin hungarez kanë pësuar lëndime të shumëfishta, përfshirë thyerje dhe djegie nga mjetet ndezëse e shpërthyese.
