Konstruktive dhe shumë të dobishme e ka vlerësuar vizitën dhe takimet e djeshme në Kosovë, përfaqësuesi i Posaçëm i Bashkimit Evropian për Dialogun, Kosovë-Serbi, Miroslav Lajçak.
Ai pas takimit me kryeministrin Albin Kurti ka folur para gazetarëve, teksa ka thënë se pritshmëritë e tij në takim me të parin e ekzekutivit janë përmbushur sa i përket asaj se si e sheh Kosova zbatimin e planit të propozimit evropian.
E për takimet e fundit të Lajçak dhe diskutimet nga spektri politik në Kosovë për zhvillimet rreth dialogut, ka reaguar sot në një postim në rrjetin social deputeti nga radhët e Lëvizjes Vetëvendosje, Artan Abrashi.
Ai tha se sikurse më 27 shkurt gjatë takimit në Bruksel, po ashtu edhe dje nga vizita e Lajçak nuk është folur për Asociacionin, por për të sipas tij flasin më së shumti ata të cilët e kanë nënshkruar, votuar dhe arsyetuar gjatë krejt këtyre viteve.
“Qeveria nuk po flet për asociacionin. Lajcak mbrëmë tha se asociacioni nuk është në agjendë. Borrel në konferencën për media pas takimit të 27 shkurtit foli 10-15 minuta pa e përmendur as edhe një herë asociacionin. Ironikisht, në Kosovë për asociacionin dhe rrezikun prej tij flasin më së shumti ata të cilët e kanë nënshkruar, votuar dhe arsyetuar gjatë krejt këtyre viteve”, ka shkruar deputeti Abrashi.
Ndërkohë përfaqësuesi i Posaçëm i Bashkimit Evropian për Dialogun, Kosovë-Serbi, Miroslav Lajçak do të qëndrojë edhe sot në Kosovë dhe mandej pritet ta vizitojë edhe Beogradin.
Kjo është vizita e parë e tij në Kosovë e Serbi, që nga takimi i 27 shkurt në mes të kryeministrit të Kosovës Albin Kurti dhe presidentit të Serbisë Aleksandar Vuçiq, që u mbajt në Bruksel.
Pas atij takimi kryeministri i Kosovës, Albin Kurti, pati thënë se ai ishte i gatshëm të firmoste dakordimin për propozimin evropian porse, sipas tij, pala serbe ka refuzuar.
E presidenti i Serbisë, Vuçiq, pati deklaruar se nuk është arritur asgjë, meqë Kurti ka refuzuar Asociacionin. Megjithatë, për zyrtarët e BE-së takimi ka qenë i suksesshëm.
Shefi i Politikës së Jashtme të Bashkimit Evropian, Josep Borrell, kishte thënë se të dy liderët janë pajtuar se më nuk ka nevojë për diskutime për propozimin e BE-së dhe se ata kanë shprehur gatishmërinë të vazhdojnë me implementimin e marrëveshjes pas diskutimeve për modalitetet e dispozitave të saj.
Takimi i radhës në mes të Kurtit e Vuçiqit pritet të mbahet më 18 mars në Maqedoninë e Veriut.
