I dërguari i Posaçëm i Bashkimit Evropian për dialogun, Miroslav Lajçak, ka përfnduar vizitën e tij katërditore në Kosovë dhe Serbi, pak ditë para takimit të radhës ndërmjet kryeministrit Albin Kurti dhe presidentit Aleksandar Vuçiq, që pritet të mbahet më 18 mars në Ohër.
Përmes një postimi në rrjetin social Twitter, Lajçak njoftoi se ka përfunduar edhe takimin e dytë me Vuçiqin, teksa tha se e ka dëgjuar atë lidhur me komentet që ai ka për aneksin e zbatimit të marrëveshjes dhe rrugën para në BE.
Pasi ka marrë përshtypjet nga të dy palët, nga Kurti e Vuçiqi, Lajçak deklaroi se është i gatshëm t’i finalizojë përgatitjet për takimin e rëndësishëm të nivelit të lartë, në Maqedoni të Veriut, që pason atë të mbajtur në Bruksel, më 27 shkurt.
“Pasi kemi marrë komentet nga të dyja palët, tani do të finalizojmë përgatitjet tona përpara takimit në Ohër të shtunën”, theksoi emisari Lajçak, pas takimit me Vuçiqin në Beograd.
Para se të shkonte në Beograd, Lajçak fillimisht u ndal në Kosovë, në një takim me kryeministrin Albin Kurti, të enjten.
Lajçak njoftoi se kjo vizitë, qëllim kryesor pati që BE të dijë se ku qëndron dhe si e sheh Kosova procesin e implementimit të propozimit evropian.
Ai pati deklaruar se takimi ishte frytdhënës, dhe se Kurti i ka dhënë më shumë informacione mbi qëndrimin e tij në këtë proces.
“Qëllimi i vizitës sime në Prishtinë sot është për të diskutuar mbi implementimin e dokumentit me kryeministrin Kurti dhe mund të them se patëm diskutim konstruktiv, të rëndësishëm dhe shumë frytdhënës mbi këtë. Por, qëllimi kryesor i vizitës është të marr informacione se si e sheh Kosova implementimin. Dhe ky takim i ka përmbushur pritshmëritë e mia në këtë kontekst. Tash di më mirë se cilat janë pritshmëritë edhe të Kosovës për implementimin”, deklaroi Lajçak para mediave.
Përpos vizitës së përfaqësuesit të BE-së, në Prishtinë dhe Beograd do të zbarkojë edhe I dërguari i ShBA-ve për Ballkanin Perëndimor, Gabriel Escobar.