Ministri në detyrë i Financave, Hekuran Murati, ka reaguar ashpër ndaj kryetarit të Prishtinës, Përparim Rama, duke e akuzuar për përhapje të të pavërtetave lidhur me procesin e buxhetit komunal,shkruan KosovaNews
Sipas Muratit, është vetë Komuna e Prishtinës ajo që ka dështuar ta miratojë buxhetin brenda afateve ligjore, dhe jo Qeveria ajo që e ka bllokuar atë.
“Buxheti komunal duhet të miratohet nga asambleja komunale deri më 30 shtator, në mënyrë që të përfshihet në Ligjin e Buxhetit që Qeveria ia dërgon Kuvendit më së voni më 31 tetor,” ka sqaruar Murati. “Komuna e Prishtinës nuk e ka bërë këtë as në shtator e as në tetor – projektbuxheti është miratuar më 9 dhjetor, pra jashtë të gjitha afateve.”
Ai shton se për ta bërë funksional buxhetin e vonuar të Prishtinës, kërkohet një ndryshim në Ligjin e Buxhetit, i cili duhet të miratohet nga Kuvendi – një proces i pamundur aktualisht për shkak të bllokadës së opozitës.
“Përparim Rama e ka shumë më të lehtë t’i kërkojë partisë së tij, LDK-së, të ndihmojë në konstituimin e Kuvendit, sesa të shpërndajë akuza të pavërteta,” thekson Murati.
