Në Dhomat e Specializuara të Kosovës (DhSK) në Hagë edhe sot mbahet seanca gjyqësore në rastin e ish- krerëve të UÇK-së, Hashim Thaçt, Jakup Krasniqit, Kadri Veselit dhe Rexhep Selimit.
Vazhdimi i procesit bëhet me paraqitjen e provave nga ana e Zyrës së Prokurorisë Speciale, respektivisht me dëgjimin e dëshmitarëve.
Edhe seanca e sotme mund të mbahet me dyer të mbyllura në shumicën e kohës, kur dëshmitarët japin dëshmitë e tyre.
Në fazën e provave në këtë gjykim, personi i parë që ka nisur dëshminë, të martën, është një grua. Por që kjo seancë kaloi në private.
Në seancën e së martës, Prokuroria kërkoi që të pranohen si prova- materiale shtesë. Por, ky propozim u kundërshtua nga mbrojtësi i Selimit, avokati Geoffrey Roberts, i cili tha se është e çuditshme që secili dëshmitar që sjellë material të ri, të pranohen si informata shtesë.
Duke pasur një kundërshtim të tillë, prokurori Matt Halling kërkoi të kalohet në seancë private për parashtrimin e pyetjeve për dëshmitaren.
Ndryshe javën e kaluar janë mbajtur seancat, ku kanë folur prokuroria, mbrojtja dhe të akuzuarit.
Aktakuza e parë kundër katër të akuzuarve u konfirmua më 26 tetor 2020 dhe u bë publike më 5 nëntor 2020.
Sipas aktakuzës, krimet e paraqitura në të u kryen më së paku prej marsit 1998 deri në shtator 1999 në disa vendndodhje në Kosovë, si edhe në Kukës dhe Cahan, në Shqipërinë Veriore. Pretendohet se këto krime u kryen nga anëtarë të UÇK-së kundër qindra civilëve dhe personave që nuk merrnin pjesë në luftime. Në aktakuzë pretendohet se Thaçi, Veseli, Selimi dhe Krasniqi kanë përgjegjësi penale individuale për krime që u kryen në kontekstin e një konflikti të armatosur jo ndërkombëtar në Kosovë dhe ishin pjesë e një sulmi gjerësisht të përhapur dhe sistematik kundër personave që dyshoheshin se ishin kundër UÇK-së.
