Autobusëve që janë në shërbim të Trafikut Urban në Prishtinë u është ndërruar ngjyra.
Nga e verdha simbolike, autobusët janë bërë ngjyrë rozë për muajin tetor, për nder të muajit për ndërgjegjësimin ndaj kancerit të gjirit.
Ky muaj do të shënohet me një mori aktivitetesh në Prishtinë, përfshirë dhe maratonën “Race for the Cure Prishtina”.
“Falënderoj drejtorin e Drejtorisë së Shëndetësisë, Dr.Izet Sadiku dhe po ashtu doktorët e bashkëpuntorët tjerë për punën e palodhshme që po e bëjnë për këtë kauzë të rëndësishme” tha i pari i Prishtinës, Përparim Rama, teksa njoftoi se të gjitha gratë dhe vajzat mund të bëjnë kontrolle në Qendrat e mjekësisë familjare të qytetit, tri prej të cilve ofrojnë falas shërbimin e mamografisë.
Ky është njoftimi i plotë i Ramës:
Të dashur qytetarë,
Me 01 Tetor të gjithë duhet të vrapojmë për një kauzë shumë të rëndësishme, ndërgjegjësimin ndaj sëmundjes së kancerit të gjirit.
Të nderuara, nëna, motra, gra bëni kontrolle në Qendrat tona të mjekësisë familjare, në tre QMF mund ta bëni mamografinë falas.
Kontrolli dhe zbulimi me kohë i sëmundjes mund të shpëtojë jetë!
Autobusët e Trafiku Urban Prishtinë tashmë kanë marë ngjyrë rozë në kuadër të fushatës “Race for the Cure Prishtina”.
Falënderoj drejtorin e Drejtorisë së Shëndetësisë, Dr.Izet Sadiku dhe po ashtu doktorët e bashkëpuntorët tjerë për punën e palodhshme që po e bëjnë për këtë kauzë të rëndësishme.
